Almatynyń Áýezov aýdanynda Qala kúnine oraı aýdany 400 sharshy metr jańa jastar komúnıtı-ortalyǵy ashyldy. Munda dybys jazý stýdıasy, bı zaly, robototehnıka men 3D-modeldeý aımaqtary, sıfrlyq kontent jasaý keńistigi, sondaı-aq bilim berý jáne keńes berý alańdary jabdyqtalǵan. Ortalyqtyń barlyq múmkindigi jastarǵa tegin qoljetimdi, dep habarlaıdy infohub.kz saıty.
Jańa keńistikpen Almaty ákiminiń orynbasary Abzal Núkenov tanysty. Nysannyń ashylýy Almaty ákimi Darhan Satybaldynyń qoldaýymen jastar ortalyqtary jelisiniń damýyn jalǵastyrdy. Qazirgi tańda qalanyń barlyq aýdanynda osyndaı 12 alań jumys istep tur.
«Jastar ortalyǵy tek is-shara ótetin oryn emes, jas adam bilim alyp, damyp, óz ıdeıasyn júzege asyra alatyn keńistik bolýy mańyzdy», — dedi Abzal Núkenov.
Jańa ortalyqtyń bir baǵyty — «AI Kreator» kýrsy. Munda jastarǵa kontent jasaýda jasandy ıntellektini paıdalanýdy úıretedi: ıdeıa men senarıden bastap vızýal, dybys jáne montajǵa deıin. Birinshi legine 20-ǵa jýyq adam tirkeldi.
Dybys jazý stýdıasynda án men podkast jazýǵa, bı zalynda vorkshop ótkizýge, kontent aımaǵynda foto men vıdeo túsirýge bolady. Robototehnıka men 3D-modeldeý aımaǵynda ashylýǵa oraı Almatynyń sımvoldarynyń biri — almasy bar «Tilek aǵashy» jasaldy.
Ashylý kúni ALMATY 24 sagat beınebaıqaýy da bastaldy. 24 saǵat ishinde qatysýshylar qala, óz aýdany, súıikti jerleri men adamdary týraly qysqa beıne túsirýi kerek.
«Árbir jas adamnyń óz baǵytyn tabýyna — jańa daǵdy ıgerýine, tehnologıada, shyǵarmashylyqta ózin synap kórýine nemese jeke jobasyn bastaýyna múmkindik bolǵanyn qalaımyz», — dep túsindirdi Almaty jastar saıasaty basqarmasynyń basshysy Azız Kajdenbek.
Jyl basynan beri 10,6 myńnan astam jas almatylyq komúnıtı-ortalyqtardan jumysqa ornalasý men kásiptik baǵdar boıynsha kómek, sondaı-aq psıhologıalyq jáne quqyqtyq keńes aldy. «Zań jáne tártip» baǵyty aıasynda munda 18 myńnan astam adam qatysqan 190-ǵa jýyq is-shara ótti, al «Taza Qazaqstan» aıasyndaǵy 80-nen astam ekologıalyq aksıa 10 myńnan astam jas qala turǵynyn biriktirdi.