Almatyda oqý jylynyń basyna qaraı 15 magıstraldyq kóshede ortasha jóndeý jumystary aıaqtaldy, sondaı-aq qalǵan nysandardaǵy jumystardy aıaqtaý merzimderi belgilendi, dep habarlaıdy infohub.kz saıty.
Bıyl ońtústik astanada jalpy uzyndyǵy 250 shaqyrymdy quraıtyn 340 kósheni ortasha jóndeýmen qamtý josparlanýda. Qalalyq ákimdikte atap ótkendeı, bul jaqsy jáne qanaǵattanarlyq jaǵdaıdaǵy joldardyń úlesin 95 paıyzǵa jetkizýge múmkindik beredi.
Jol ınfraqurylymyn damytý basqarmasynyń málimetinshe, 1 qyrkúıekke qaraı uzyndyǵy 32 shaqyrymdy quraıtyn 15 magıstraldyq kósheniń ýchaskelerinde jóndeý jumystary aıaqtaldy. Olardyń qatarynda Zenkov, Jamaqaev, Jetisý, Shemákın, Mámbetov, Rysqulbekov, Janqoja batyr, Iskendirov, Aqan Seri, Manas, Ǵabdýllın, Jandosov, Ortalyq, Úshqempirov kósheleri jáne Qulja traktisi bar.
Sonymen qatar, Jubanov, Ótegen batyr kósheleriniń ýchaskelerinde, sondaı-aq Altynsarın jáne Abaı dańǵyldarynda asfáltbeton jabynynyń tómengi qabaty tóselgen. Aldaǵy demalys kúnderi tyǵyz qıyrshyqtas-mastıkalyq asfáltbeton qospasynan joǵarǵy qabatty tóseý josparlanýda, odan keıin jol belgileri syzylady. Ákimdikte ortasha jóndeý aıasynda júris bóliginiń barlyq eni boıynsha jabyn jańartylyp, trotýarlar men aryq naýalarynyń zaqymdalǵan ýchaskeleri de jóndeletinin atap ótti.
Aýdandyq mańyzy bar kóshelerge erekshe nazar aýdarylýda. Alataý aýdanynda bıyl 99 kóshe, Áýezov aýdanynda – 16, Naýryzbaı aýdanynda – 19, Bostandyq aýdanynda – 39, Túrksib aýdanynda – 21, Jetisý aýdanynda – 44, Medeý aýdanynda – 78, Almaly aýdanynda – 1 kóshe ortasha jóndeýmen qamtylady. Qazirgi ýaqytta jumystar 70 paıyzǵa aıaqtalǵan, tolyq aıaqtaý 31 qazanǵa deıin josparlanǵan.
Sonymen qatar, basqarma tarapynan Aqjar, Boraldaı jáne Rahat-Mádenıet shaǵyn aýdandarynda jalpy uzyndyǵy 96 shaqyrymdy quraıtyn jańa joldardyń qurylysy jalǵasýda, onyń 80 paıyzdan astamy daıyn.