Almaty haıýanattar baǵynda Prjevalskı jylqysynyń qulyny dúnıege keldi. Oǵan Jelmaıa degen at qoıyldy. Qulyn Kýrbankýl atty bıeden týdy. Bul – onyń ekinshi toly. Bul týraly Almaty ákimdigi habarlady. Tolyǵyraq — infohub.kz saıtynda.
Prjevalskı jylqysy – planetadaǵy eń sırek kezdesetin jabaıy jylqy túrleriniń biri. Ol Qazaqstannyń Qyzyl kitabyna jáne Halyqaralyq tabıǵat qorǵaý odaǵynyń Qyzyl tizimine engizilgen.
Almaty haıýanattar baǵy joıylyp bara jatqan janýarlardy – aqbóken, aq aıý, aqsúmbe búrkit jáne, árıne, Prjevalskı jylqysyn saqtaý baǵdarlamalaryna qatysady. Árbir tóldiń dúnıege kelýi qyzmetkerler úshin qýanysh qana emes, sonymen qatar bıoalýantúrlilikti saqtaýǵa jáne joıylyp bara jatqan túrlerdiń bolashaǵyna qosylǵan mańyzdy úles sanalady.
«Janýarlarǵa barynsha jaıly jaǵdaı jasalady, juptar halyqaralyq asyldandyrý baǵdarlamasynyń usynystaryna sáıkes irikteledi, turaqty veterınarıalyq baqylaý júrgiziledi. Árbir qulynnyń dúnıege kelýi bul jumystyń nátıje beretinin jáne álemdegi saqtalǵan jalǵyz jabaıy jylqy túrin saqtaýǵa kómektesetinin dáleldeıdi», – dedi Almaty haıýanattar baǵynyń zooveterınarıa bóliminiń dırektor orynbasary Aǵybaı Ájibaev.
Qazirgi ýaqytta Prjevalskı jylqylarynyń toby kelýshiler úshin jabyq arnaıy «tynysh» aımaqta ornalasqan. Anasy men qulynynyń jaǵdaıy jaqsy. Buǵan deıin Prjevalskı jylqylarynyń bir toby Berlın haıýanattar baǵynan Qazaqstanǵa jetkizilgeni habarlanǵan bolatyn. Bul janýarlardyń qazaq dalasynda qalaı ómir súrip jatqany týraly aldyńǵy jarıalanymdardan bilýge bolady.