Áleýmettik jelilerde jasyl jaılaýlar men tóbeden relspen arnaıy arbalarmen túsetin týrıser beınelengen erekshe atraksıon vıdeo taralyp júr. Kóptegen qoldanýshylar bul jer Almatyǵa jaqyn dep oılady. Shyn máninde, bul kadrlar Qytaıdyń Shyńjań-Uıǵyr avtonomıaly aýdanyndaǵy eń tanymal kórikti jerlerdiń biri – Narat (Nalaty) jazyǵynda túsirilgen, dep habarlaıdy infohub.kz saıty.
Jaılaýlar Tán-Shan eteginde shamamen 2 myń metr bıiktikte ornalasqan jáne óńirdiń eń ádemi tabıǵı oryndarynyń qataryna kiredi. Vıdeo avtory Almatydan Inın (Qulja) qalasyna ushaqpen, sodan keıin taǵy tórt saǵattaı kólikpen jetkenin aıtady. Sondaı-aq, ol ulttyq parkke kirý aqyly ekenin, al ishinde áleýmettik jelilerde taralǵan relsti arbalar atraksıony jumys isteıtinin atap ótti.
Týrıser bul sapardy «jumaqqa aparatyn jol» dep ataıdy, al kópshiligi kórinisterdi Shveısarıamen nemese Studio Ghibli múltfılmderiniń kadrlarymen salystyrady. Saıahatshylardyń eń kóp taraǵan keńesteri: maýsymnan tamyzǵa deıin kelý, joǵarǵy baqylaý alańdaryna kóterilý jáne parkke bir kún bólý, sebebi ishinde arnaıy shattldarmen júrý kerek.
Almatydan Inınge halyqaralyq avtobýspen de jetýge bolady, biraq shekaradan ótýdi eseptegende jol shamamen 12 saǵatqa sozylady.
Eske sala keteıik, Qazaqstan azamattary úshin Qytaımen vızasyz rejım qoldanylady. Qazaqstan azamattary QHR-da bir saparda 30 kúnge deıin, biraq 180 kún ishinde 90 kúnnen aspaıtyn merzimge vızasyz bola alady.
Buǵan deıin «Kýrsıv» Quljada ne kórýge bolatyny týraly jazǵan bolatyn.