Almaty turǵyny adal emes merdigerden iri somany sot arqyly óndirip aldy. Merdiger aqshany alǵanymen, jumysty aqaýly oryndap, aıaqtamaǵan. İs Jambyl oblysynyń Moıynqum aýdandyq sotynda qaraldy. Páter ıesi jeke kásipkerge qarsy talap aryzben júgingen. Nátıjesinde kelisimshart buzylyp, jaýapkerden mıllıondaǵan teńge óndirildi... dep habarlaıdy infohub.kz.
2025 jyldyń qazan aıynda tapsyrys berýshi men merdiger arasynda Almatydaǵy páterde jóndeý jumystaryn júrgizý týraly kelisimshart jasaldy. Jobanyń jalpy quny 6,2 mıllıon teńgeni qurady. Tapsyrys berýshi jumystyń alǵashqy úsh kezeńi úshin merdigerge 4,7 mıllıon teńge tóledi, alaıda jóndeý jumystary sozylyp, aıaqtalmaı qaldy. Oryndalǵan jumystar men paıdalanylǵan materıaldardyń sapasy kelisimshart talaptaryna sáıkes kelmedi.
Jeke kásipker aqaýly jumysty joıý týraly birneshe ret aıtylǵan talaptardy elemedi. Sońynda páter ıesi jóndeýshilerdiń páterge kirýine tyıym salyp, kelisimshartty buzý jáne aqshany qaıtarý týraly talappen sotqa júgindi.
Sotta jaýapker talapty moıyndamaı, jóndeýdiń bir bóligi oryndalǵanyn, al tapsyrys berýshiniń úı-jaıǵa kirýge ruqsat bermeýine baılanysty jumysty aıaqtaı almaǵanyn málimdedi. Alaıda sot taǵaıyndaǵan saraptama naqty oryndalǵan jumystar men paıdalanylǵan materıaldardyń quny 1,4 mıllıon teńgeni quraıtynyn kórsetti. Sonymen qatar, sarapshylar páterdiń barlyq bólmelerindegi búlingen plıtkany demontajdaý jáne tolyq aýystyrý qunyn 760 myń teńgege baǵalady.
Sot jeke kásipkerdiń kelisimshart talaptaryn eleýli túrde buzǵanyn, osyǵan baılanysty tapsyrys berýshi tólem kezinde kútken nátıjege qol jetkize almaǵanyn anyqtady. Sot sheshimimen qurylys merdigerlik kelisimsharty resmı túrde buzylyp, jaýapkerden talap qoıýshynyń paıdasyna 3,9 mıllıon teńge negizgi soma, sondaı-aq notarıattyq, ókildik shyǵyndar men saraptama júrgizýge 385 myń teńge óndirildi.
Qazirgi ýaqytta sot sheshimi zańdy kúshine enbegen jáne oǵan shaǵym jasalýy múmkin.