Óskemende 35 jastaǵy Almaty turǵyny áýe reısinen túsirildi, ol ushaq bortynda tártip buzǵan, dep habarlaıdy infohub.kz saıty.
Oqıǵa 24 tamyzda boldy. Kólik polıseıleri Óskemen halyqaralyq áýejaıynda Almatydan kelgen reıstegi er adamdy áýe kemesi komandıriniń aktisi negizinde ushaqtan túsirdi.
Anyqtalǵandaı, Almaty áýejaıynan ushyp shyǵý kezinde, bıiktik jınaý kezinde jolaýshy qaýipsizdik beldigin taqpaǵan jáne bortta ishken tamaq pen sýsyndardyń, onyń ishinde аlkogóldik ishimdikterdiń qaldyqtaryn kórneki túrde shashyp tastaǵan.
Er adam ekıpaj músheleriniń talaptaryn oryndamaǵan, avıakompanıa qyzmetkerleri men basqa jolaýshylarǵa baǵyttalǵan ádepsiz sózder aıtqan. Zańsyz áreketterin jalǵastyra otyryp, ol óz ornynan óz betinshe turyp, ushaqtyń artqy bóligine baryp, bos jolaýshy oryndyqtaryn ıelengen. Tekserý barysynda bul azamattyń buryn da birneshe ret jaýapkershilikke tartylǵany anyqtaldy.
Óskemenniń mamandandyrylǵan ákimshilik quqyq buzýshylyq jónindegi soty er adamdy usaq buzaqylyq jáne qoǵamdyq oryndardy lastaǵany úshin kináli dep tanyp, oǵan 20 saǵat mindetti qoǵamdyq jumys jazasyn taǵaıyndady.
Jyl basynan beri kólik polısıasy departamentiniń qyzmetkerleri ushaq bortyndaǵy ártúrli quqyq buzýshylyqtar úshin 231 adamdy jaýapkershilikke tartty.