Alty jasar qytaı qyzy Rýbık kýbıgin 4 sekýndtan sál astam ýaqytta jınap, áıelder arasyndaǵy jańa álemdik rekord ornatty. Bul týraly memlekettik buqaralyq aqparat quraldary habarlady, dep jazady infohub.kz saıty.
«Spıdkýber» Lán Iýnchjı osy aıda Ýhan men Gýanchjoýda ótken Rýbık kýbıgi qaýymdastyǵy sertıfıkattaǵan eki jarysta 3x3 boıynsha áıelder arasyndaǵy ortasha álemdik rekordty eki ret jańartty. Bul jóninde memlekettik «CCTV» telearnasy dúısenbi kúni málimdedi.
Ol Rýbık kýbıgin bes ret jınaǵan soń 4,52 jáne 4,27 sekýnd ortasha nátıje kórsetti.
Chendý qalasynan shyqqan qyz «4,5 sekýndtan tómen ortasha nátıje kórsetken tuńǵysh áıel spıdkýber» atandy, dep habarlady «CCTV».
Telearna jarıalaǵan beınejazbada ol basyna qyzyl tústi torly bantık taqqan kúıi Rýbık kýbıgin eptilikpen buryp, shıratyp jatqany kórinedi.
Kýbıkti jınap bolǵan soń ol oıynshyqty ústelge qoıyp, qolyn shapalaqtap, judyryǵyn joǵary kótergen.
«Chjıchjı» degen laqap aty bar alty jasar qyz Rýbık kýbıgimen bı jáne mýzyka sabaqtary sıaqty túrli synyptan tys úıirmelermen qatar arnaıy kýrsqa jazylǵan soń tanysqan. Bul týraly onyń anasy Lın Iansı jergilikti buqaralyq aqparat quraldaryna aıtty.
Lın kýbık jınaýdyń «balanyń jan-jaqty qabiletin damytýǵa taptyrmas áreket» ekenin «birte-birte túsinip», nazaryn soǵan aýdarǵanyn Chendýdaǵy «Red Star News» basylymyna málimdedi.
Qyzy qazir Rýbık kýbıgin jınaýdyń 1300-den astam algorıtmin meńgerip, kún saıyn eki-úsh saǵat jattyǵady, dedi Lın.
«Red Star News» jarıalaǵan sýretterde qyzdyń júldeleri úıindegi sórege qoıylǵany kórinedi.
«Rýbık kýbıgin jınaý zeıindi, jadyny, logıkalyq oılaýdy, keńistikti túısinýdi jaqsartyp, jeńis pen jeńiliske degen salaýatty kózqaras qalyptastyrýǵa kómektesedi», — dedi Lın.
«Bul formýlalardy soqyr jattaý emes, ońtaıly sheshimdi tabý úshin logıkalyq paıymdaýdy qoldaný», — dep qosty ol.