Qazaqstandyq tarıhshy Jaqsylyq Sábıtov Altyn Ordada sybaılas jemqorlyq bolǵanyn, alaıda ol kezde para men jemqorlyq qarapaıym syılyq retinde qabyldanǵanyn aıtty. Bul týraly ol Armanjan Baıtasovtyń podkastynda aıtty, dep habarlaıdy infohub.kz saıty.
Tarıhshynyń aıtýynsha, Altyn Ordada paraǵa qazirgiden múldem basqasha qaraǵan. Olar nazar men qurmet belgisi sanalǵan.
«Mońǵol ımperıasy arqyly ótken alǵashqy saıahatshylar qatty tańǵalǵan, óıtkeni olardan is júzinde syılyq talap etilgen. Árkim olardan birdeńe alǵysy kelgen. Eýropadan elshiler kelse, olardyń keıbiri onsha baı bolmasa da, báribir olardan syılyq talap etilgen», — dedi ol.
Parany saıası máselelerdi sheshý úshin de qoldanǵan. Mysaly, orys knázdary uly knázdikke jarlyq alý úshin Ordaǵa únemi aqsha aparǵan.
«Orys knázdary Altyn Ordaǵa barǵanda, olarǵa bir máseleni sheshý kerek boldy, mysaly, Vladımırdiń uly knázi kim bolady. Olardyń árqaısysy osy máseleni óz paıdasyna sheshý úshin aqsha aparǵan», — dep qosty Sábıtov.
Sonymen qatar, sarapshy mundaı áreketterdi qazirgi maǵynada sybaılas jemqorlyq dep ataýǵa bolmaıtynyn atap ótti, óıtkeni sol dáýirdegi memleket qurylymy túbegeıli erekshelengen.