Satbayev University-de Altyn Orda qalalaryn zertteýde sıfrlyq tehnologıalardy qoldaný jóninde arheologıa, tarıh, geologıa jáne basqa ǵylym salalarynyń jetekshi mamandary pikir almasty, dep habarlaıdy infohub.kz.
Kezdesýge qatysýshylar arheologıalyq murany sıfrlyq qaıta jańǵyrtýdyń jańa ádisterin, sonyń ishinde nysandardy úsh ólshemdi modeldeý, geoaqparattyq júıeler men jasandy ıntellekt tehnologıalaryn paıdalanýdy qarastyrdy.
İs-shara Memleket basshysynyń ulttyq tarıhı murany zertteý, saqtaý jáne ǵylymı turǵydan paıymdaý jónindegi bastamalaryn iske asyrý aıasynda uıymdastyryldy. Satbayev University-de pánaralyq zertteýlerge erekshe kóńil bólinedi: ınjenerlik ǵylymdar, sıfrlyq tehnologıalar, tarıh jáne arheologıa birin-biri tolyqtyryp, shynaıy ǵylymı nátıjeler alýǵa jańa múmkindikter ashady.
«Qazaqstan – Altyn Orda tarıhynyń negizgi qalalary shoǵyrlanǵan erekshe aýmaq. Bul ólke álemge sansyz biregeı tulǵalardy, mádenıet jáne turmys buıymdaryn berdi. Sıfrlyq tehnologıalardyń damýy bizge osy zertteýlerge GAJ-tehnologıalaryn, sapaly kartaǵa túsirýdi engizýge múmkindik beredi. Qazir biz qalalardy jeke ortalyqtar retinde emes, osy aýmaqtyń, landshafttardyń damýy men ózgeris dınamıkasynyń tutas beınesin alamyz», – dep atap ótti Satbaev atyndaǵy Geologıalyq ǵylymdar ınstıtýtynyń dırektorynyń orynbasary Saıda Nıgmatova.