Qazaqstanda Salyq kodeksine «Altyn vıza» ıelerine jeke jaǵdaılar qarastyratyn ózgerister engizý josparlanýda, dep habarlaıdy infohub.kz saıty.
Ulttyq ekonomıka mınıstrliginiń buıryq jobasyna sáıkes, «Altyn vıza» ıeleri men olardyń otbasy músheleri úshin arnaıy salyq salý tártibi belgilenedi. Sondaı-aq «Astana» halyqaralyq qarjy ortalyǵynyń ınvestorlary úshin QR rezıdenti mártebesin rastaıtyn qujatty berý úshin 7 myń AEK mólsherindegi alymdy alyp tastaý jáne ınvestorlardyń ınfraqurylym obektilerin qurýǵa jumsaǵan shyǵyndaryn salyq tólemderi esebinen óteý múmkindigin qarastyrý usynylady.
«Sonymen qatar, basym ınvestısıalyq jobalar men ınvestısıa týraly kelisim jasasqan tulǵalar úshin buryn qoldanysta bolǵan jekelegen salyq salý normalaryn qalpyna keltirý usynylady», — delingen qujatta.
Jekelegen salyq tetikterin jetildirý úshin 2026 jylǵy 1 qańtardan 2028 jylǵy 31 jeltoqsanǵa deıin: jeke tulǵalardy qazaqstandyq provaıderler arqyly sıfrlyq aktıvtermen operasıalardan túsken tabystar boıynsha jeke tabys salyǵynan bosatý; ekinshi deńgeıdegi bankterdiń faktorıńtik jáne forfeıtıńtik operasıalaryn QQS-tan bosatý; taýarlardy tańbalaýǵa arnalǵan shyǵystardy naqty jumsalǵan shyǵyndardyń 150% mólsherinde shegerimge jatqyzý usynylady. Budan basqa, ózin-ózi jumyspen qamtyǵandar úshin arnaıy salyq rejımin qoldaný sharttary naqtylanady, JSHS quryltaıshylary men AQ aksıonerleriniń ony paıdalaný múmkindigi alynyp tastalady.
«Usynylǵan bastamalar, sondaı-aq jobada qarastyrylǵan basqa da túzetýler Salyq kodeksiniń jekelegen erejelerin ony qoldaný tájirıbesin eskere otyryp naqty túzetýge, ákimshilik kedergilerdi azaıtýǵa jáne ınvestısıalyq jáne bıznes belsendilik úshin neǵurlym túsinikti jaǵdaılar jasaýǵa baǵyttalǵan», — dep atap ótilgen buıryq mátininde.
Joba 25 qyrkúıekke deıin qoǵamdyq talqylaýda. Buǵan deıin Qazaqstanda qazaqstandyq kompanıalardyń kapıtalyna nemese jergilikti baǵaly qaǵazdaryna keminde 300 myń dollar ınvestısıalaǵan sheteldikter úshin jańa «Altyn vıza» engiziletini habarlanǵan bolatyn.