Aljır orman men egistik alqaptaryn qasaqana órtegenderge ólim jazasyn kózdeıtin zań qabyldady. Buǵan deıin eldiń birqatar aımaǵyn sharpyǵan alapat órtter bolǵan edi, dep habarlaıdy infohub.kz saıty.
Ulttyq jınalys depýtattary beısenbi kúni osy zań jobasyn daýysqa salyp maquldady. Qujat boıynsha bala urlaý da ólim jazasyna tartylatyn qylmys sanatyna engizildi.
Aljırdiń qylmystyq kodeksinde keıbir qylmystar úshin ólim jazasy burynnan bar. Alaıda 1993 jyldan beri elde birde-bir adam atylmaǵan.
Resmı derekterge sáıkes, órtterden 12 adam qaza tapty. Al táýelsiz aqparat quraldary bul kórsetkish áldeqaıda joǵary dep esepteıdi.
Soltústik Afrıkadaǵy qatty ystyq kezeńde eldiń soltústik-shyǵysynda 100-den astam órt tirkelgen soń, Aljır Prezıdenti Ábdelmájıd Tebbýn ádilet mınıstrligine qylmystyq zańǵa ózgerister engizýdi tapsyrǵan bolatyn.
Jańa zań boıynsha ormandy, toǵaıdy nemese egistik alqapty qasaqana órtegeni úshin sottalǵan adam ólim jazasyna kesilýi múmkin.
Sondaı-aq azaptaý, jynystyq zorlyq nemese múshesin zaqymdaýmen ushtasqan bala urlaý qylmysyna da ólim jazasy qarastyrylǵan.
Ádilet mınıstri Lotfı Býdjemaa parlamentte sóılegen sózinde: «Osy áreketter úshin ólim jazasyn qabyldaý — bul qylmystardy tejeýdiń oryndy quqyqtyq jaýaby», — dedi. Bul týraly Frans Pres aqparat agenttigi habarlady.
Mınıstrdiń aıtýynsha, qatań jazanyń qajettiligi órt qoıý «uıymdasqan qylmys deńgeıine» jetkenimen jáne tergeý derekteri «sheteldik taraptarmen» baılanysty kórsetkenimen negizdelgen.
Zań Prezıdent resmı bekitkenge deıin Ult keńesinde — joǵarǵy palatada qaralady.
Tergeýshi jýrnalıs Nozha Helalef órtte qaza tapqandardyń esimderin otbasylar jarıalaǵan qaıǵyly habarlamalar men jergilikti bılik taratqan málimetter arqyly jınap júr.
Onyń táýelsiz Twala jańalyqtar saıtynda jarıalanǵan esebinde qaza tapqandar sany 200 dep kórsetilgen.
Aljırde jaz saıyn orman órti jıi bolady. Alaıda klımattyń ózgerýi sońǵy jyldardaǵy órtterdiń qarqyny men aýyrlyǵyn kúsheıtip otyr.