Ańyzǵa aınalǵan «Robokop» ekranǵa qaıta oralady: Prime Video strımıngtik qyzmeti segiz epızodtan turatyn serıalǵa tapsyrys berdi, dep habarlaıdy infohub.kz saıty.
Oqıǵa ortasynda úlken tehnologıalyq korporasıa turady. Ol qala bıligin polısıa qataryna qýatty robotty qosýǵa kóndiredi. Robottyń denesine qaıtys bolǵan polıseıdiń sanasy ımplantasıalanady. Bul polıseıdi jergilikti turǵyndar qaharman dep sanaıdy.
Jobanyń shoýranneri jáne senarıshisi bolyp Pıter Okko taǵaıyndaldy. Atqarýshy prodúser qyzmetin rejıser Djeıms Van («Pıla», «Zaklátıe», «Akvamen») atqarady. Jumysqa 1987 jylǵy túpnusqa fılmniń teń avtorlary Ed Noımaıer men Maıkl Maıner de qosylady.
«Tehnologıalar, tulǵa jáne korporasıalardyń shyn máninde kimge qyzmet etetini týraly suraqtar búgin 1987 jylmen salystyrǵanda odan da ózekti bop otyr», — dedi Djeıms Van. Onyń aıtýynsha, avtorlar túpnusqa «Robokoptyń» rýhyn saqtap, sonymen birge jańa aýdıtorıa úshin oqıǵany zamanaýı ári ózekti etýge tyrysady.
«Robokop» franshızasy 1987 jyly Pol Verhovenniń attas fılmimen bastaldy. Keıin eki jalǵasy, 2014 jylǵy rebýt, birneshe serıal, mýltserıal, komıks jáne beıneoıyndar shyqty.
Jańa serıal Amazon MGM Studios kompanıasynyń kúlttik franshızalardy damytý strategıasynyń bir bóligi bolady. Bul franshızalardyń quqyǵyn kompanıa 2022 jyly MGM stýdıasyn satyp alǵannan keıin alǵan bolatyn. «Robokoptan» basqa, kompanıa Djeıms Bond álemin belsendi damytyp, MGM-niń basqa da tanymal fılmderi boıynsha jańa jobalarmen jumys isteýde.