American Airlines әуекомпаниясының ең үлкен бортсерігі Кэрол Фэйр 83 жасында кәсіби мансабын аяқтады: соңғы рейсін Шарлоттқа жасады, деп жазады People, хабарлайды infohub.kz сайты.
Стюардесса ұшқан ұшақ Лондоннан кейін Шарлотт/Дуглас халықаралық әуежайына қонды. Ұшу-қону жолағында бортты өрт сөндірушілердің су атқыштарынан жасалған дәстүрлі су аркасымен қарсы алды. Әріптестері мен жолаушылар авиация ардагеріне салтанатты шығарып салу рәсімін ұйымдастырып, азаматтық авиациядағы рекордтық еңбек өтілі құрметіне гүл, естелік лента және тәж табыс етті.
Фэйр мансабын 1963 жылы кейіннен American Airlines құрамына енген Piedmont Airlines әуекомпаниясында бастаған. Бастапқыда қыз стюардесса болып бар болғаны жарты жыл жұмыс істеуді жоспарлаған, алайда кәсібіне әуестеніп, ұшуға бүкіл өмірін арнады. Алпыс жылдық еңбегі ішінде ол компанияның ұшу экипаждары қызметкерлерінің жалпы еңбек өтілі тізімінде бірінші орынға көтерілді.
Соңғы рейсінде бортсерігі жолаушыларға алғыс айтып, жаңадан келген әріптестеріне ақыл-кеңес берді. Оның айтуынша, бортсерігі мамандығында ең бастысы — жолдың басында табандылық танытып, өз ісін шын жүректен сүю. Енді 83 жастағы америкалық әйел бос уақытын отбасы мен демалысқа арнауды жоспарлап отыр.