Parıjde amerıkandyq mıllıarderdiń jalpy quny shamamen 1,3 mln eýro bolatyn zergerlik buıymdary salynǵan chemodany joǵaldy. Bul týraly infohub.kz saıty habarlaıdy.
Oqıǵa ortalyǵynda medısınalyq tehnologıalar saýdasynan baılyq tapqan 45 jastaǵy kásipker bar. Ol 19 shilde kúni keshke Nıssadan Rýassı — Sharl-de-Goll áýejaıyna ushyp kelgen. Er adam Elıseı dalasynyń janyndaǵy Four Seasons qonaq úıine toqtaýdy josparlaǵan. Áýejaıda ony jeke agenttiktiń qyzmetkeri kútip alǵan, oǵan bagajdy qonaq úıge jetkizý tapsyrylǵan.
Qonaq úıge jetken soń, er adam qalany aralaýǵa ketken. Keshke bólmege qaıtyp kelgende, oǵan tek eki chemodan jetkizilgenin baıqaǵan. Úshinshisi, ol qol júgi retinde alyp, áýejaıda agenttik qyzmetkerine birinshi bolyp bergen chemodany joǵalyp ketken.
Beınebaqylaý kameralarynyń jazbalary qonaq úıdiń janyndaǵy kólikten tek eki chemodan túsirilgenin kórsetken. Aldyn ala boljam boıynsha, úshinshi bagaj áýejaıda joǵalǵan nemese urlanǵan.
Joǵalǵan qundylyqtardyń ishinde quny 800 myń eýro bolatyn saqına jáne taǵy birneshe zergerlik buıymdar bar. Zergerlik buıymdardyń jalpy quny shamamen 1,3 mln eýroǵa baǵalanyp otyr.
Polıseıler mıllıarderdi kútip alǵan jeke kompanıanyń qyzmetkerin jaýapqa aldy. Onyń tergeýge naqty ne aıtqany jarıalanbaıdy. Kompanıanyń ózi túsinikteme berýden bas tartty. Tergeýdi fransýzdyń Val-d'Ýaz departamentiniń polısıasy júrgizip jatyr.