Qazaqstanda táýelsizdik tarıhynda alǵash ret ákimshilik amnıstıa jasaldy. Onyń aıasynda bir aıdan az ýaqyt ishinde 681,7 myń azamat óndirip alýdan bosatyldy. Bul týraly Bas prokýror Berik Asylov málimdedi, dep habarlaıdy infohub.kz saıty.
Bas prokýrordyń naqtylaýynsha, amnıstıa 1,3 mln ákimshilik isti qamtydy. Barlyǵy 22,8 mlrd teńge kóleminde aıyppul keshirildi. Tizim ÁQBtK-niń 380-nen astam babyn qamtydy, onyń ishinde salyq, keden, ekologıa, sanıtarıa salalaryndaǵy, sondaı-aq kásipkerlik jáne saýda salalaryndaǵy quqyq buzýshylyqtar bar.
Berik Asylov amnıstıanyń tek sıfrlyq túrde júzege asyrylǵanyn atap ótti. Turǵyndarǵa ótinish jazý, qujat jınaý nemese memlekettik organdarǵa barý qajet bolmady. Prokýratýranyń aqparattyq júıeleriniń úılesimdi jumysy men vedomstvoaralyq yntymaqtastyqtyń arqasynda ister boıynsha is júrgizý avtomatty túrde toqtatyldy.
Ákimshilik isterdiń toqtatylǵany týraly habarlamalar azamattarǵa SMS arqyly keldi.
Amnıstıa kóptegen azamattarǵa qarjylyq aýyrtpalyqtan qutylýǵa ǵana emes, sonymen qatar ilespe máselelerdi retteýge múmkindik berdi: atqarýshylyq is júrgizýdi aıaqtaý, shekteýlerdi joıý jáne buryn alynǵan múlikti qaıtarý.
Mysal retinde Jetisý oblysynyń turǵynynyń jaǵdaıy keltiriledi. Onyń kóligi jyl basynan beri aıyppuldardy tólemegeni úshin arnaıy turaqqa qoıylǵan edi. Amnıstıa zańy kúshine engennen keıin is júrgizý toqtatylyp, avtokólik ıesine qaıtaryldy.