Anglıanyń soltústigindegi Kambrıa graftyǵynyń jaǵalaýynda Velella velella dep atalatyn sırek teńiz tirshilik ıeleriniń jappaı paıda bolýy tirkeldi. «Jelkendiler» dep te atalatyn júzdegen erekshe kók organızmder Sent-Bıs jaǵajaıynda baıqaldy, dep habarlaıdy infohub.kz saıty.
Jergilikti turǵyn Lýıza Nıkolson aldymen olardy baldyrlarǵa uqsatyp, bireýin qolyna ala jazdaǵanyn, biraq ýaqytynda toqtap, sýretke túsirgenin aıtty. Tabylǵan daraqtardyń kópshiliginiń mólsheri shamamen bes santımetrdi quraıdy.
Kambrıa jabaıy tabıǵat qorynyń teńiz ortasy bóliminiń jetekshisi Djordjıa de Iong Kleındert bul organızmder medýzaǵa uqsaǵanymen, olar medýza emes ekenin túsindirdi. Olar kolonıalyq gıdroıdtarǵa jatady jáne birtutas júzetin kolonıa retinde jumys isteıtin júzdegen mamandandyrylǵan daraqtardan turady. Óz ataýyn olar sýda qozǵalýǵa múmkindik beretin qatty jartylaı móldir «jelkenine» baılanysty alǵan.
Mamandar bul tirshilik ıeleriniń ýly ekenin eskertip, olardy qolmen ustaýǵa bolmaıtynyn aıtady. Erekshe teńiz organızmderi jaǵajaıǵa qatty jeldiń saldarynan kelip jetken.