Qazaqstan áli de ystyqtan qysylyp jatyr. Qazgıdromet mamandary aýa temperatýrasynyń ekstremaldy deńgeıge jetý sebebin jáne buǵan klımattyń ózgerýiniń qatysyn túsindirdi, dep habarlaıdy infohub.kz saıty.
Qazgıdromettiń málimetinshe, elimizdiń keıbir óńirlerinde aýa temperatýrasy +40...+46 gradýsqa jetken. Anomaldy ystyq eki faktordyń – uzaq merzimdi klımattyń ózgerýi men qazirgi sınoptıkalyq jaǵdaıdyń úılesýinen paıda boldy. Bul rette ystyq tolqyndary tek jahandyq jylynýdan týyndady deý durys emes.
Qazgıdromette sońǵy onjyldyqtar 60 jyldyq baqylaý kezeńindegi eń ystyq bolǵanyn, al 2025 jyl eldegi meteobaqylaý tarıhyndaǵy eń jyly jyl bolǵanyn atap ótedi.
«Qazirgi sınoptıkalyq jaǵdaı Qazaqstannyń úlken bóliginde turaqty antısıklonnyń qalyptasýymen anyqtaldy, ol bulttylyqtyń damýyna kedergi keltirip, jer betiniń qarqyndy jylynýyna jáne Orta Azıa men Iran aýdandarynan Qazaqstan aýmaǵyna ystyq aýa massalarynyń kelýine sebep boldy. Nátıjesinde kóptegen óńirlerde aýa temperatýrasy +40...+46 gradýsqa jetti», — deıdi Qazgıdromettiń ǵylymı-zertteý ortalyǵynyń dırektory Tursyn Tılakárim.
Qazgıdromette jahandyq jylyný ystyqtyń árbir jeke epızodynyń tikeleı sebebi emes, biraq jalpy temperatýralyq fondy kóteretinin atap ótti. Sondyqtan uqsas sınoptıkalyq prosester búginde birneshe onjyldyq burynǵyǵa qaraǵanda joǵary temperatýraǵa ákeledi.
Qazgıdromettiń dereginshe, maýsym aıy elimizdiń ortalyq, ońtústik jáne shyǵys óńirleri úshin ekstremaldy jyly boldy. Al Qazaqstannyń batysy kerisinshe salqyn aýa raıymen sıpattaldy. Maýsymdaǵy ortasha aılyq aýa temperatýrasy klımattyq normadan 1–3 gradýsqa joǵary boldy.
«2026 jylǵy shildede Qazaqstannyń basym bóliginde ortasha aılyq aýa temperatýrasy klımattyq normadan 1-2 gradýsqa joǵary bolady dep kútilýde. Alaıda keıbir kúnderi eń joǵary kúndizgi temperatýranyń aýytqýy aıtarlyqtaı úlken bolýy múmkin jáne olar 5 gradýsqa deıin jetýi múmkin. Óńirler boıynsha aıtsaq, eń aıqyn ystyq ońtústik oblystarda, Ortalyq Qazaqstanda, sondaı-aq Qazaqstannyń ońtústik-shyǵysynyń keıbir aýdandarynda baıqalady», — dedi Tursyn Tılakárim.
Qazirgi ystyq búkil Qazaqstan úshin rekordtyq boldy dep aıtý áli erte, dep atap ótti sınoptıkter. Klımattyq rekordtar árbir meteostansıa úshin baqylaý derekterin tekserip, óńdegennen keıin jeke belgilenedi.
Sonymen qatar mundaı jaǵdaılar jıi tirkelýde. Sınoptıkterdiń málimetinshe, 2025 jyly Shymkent, Almaty, Túrkistan, Taraz, Aqtaý, Qyzylorda jáne basqa qalalarda temperatýralyq rekordtar jańartyldy. 2026 jyldyń mamyrynda 80 jyldan astam ýaqyt boıy saqtalǵan rekordty qosa alǵanda, jańa temperatýralyq maksımýmdar tirkeldi. Maýsym aıynda da jańa rekordtar tirkeldi.
Ekstremaldy ystyq kezeńinde mamandar ashyq kún astynda bolýdy, ásirese saǵat 11:00-den 17:00-ge deıin shekteýge keńes beredi. Sondaı-aq kúndizgi ýaqytta dene júktemesin azaıtyp, órt qaýipsizdigi erejelerin saqtaý qajet. Sınoptıkter resmı boljamdar men daýyldy eskertýlerdi baqylap, yqtımal qaýipti aýa raıy qubylystary týraly ýaqtyly bilip otyrýdy usynady.