Eýropadaǵy eń iri art-parkte qazaqstandyq sáýletshiler jasaǵan korten bolatynan turatyn erekshe art-nysan — «antı-kıiz úı» paıda boldy. corten yurt – anti yurt dep atalatyn joba Reseıdiń Kalýga oblysyndaǵy «Nıkola-Lenıves» parkinde ótip jatqan «Arhstoıanıe» festıvaliniń ekspozısıasyna endi, dep habarlaıdy infohub.kz.
Bolat kıiz úıdiń dıametri 5,7 metr, bıiktigi 3,3 metr. Kóshpendilerdiń dástúrli baspanasy jelden, jańbyrdan jáne kúnnen qorǵasa, «antı-kıiz úı» tabıǵattyń qubylystaryna tolyq ashyq. Jasaýshylardyń túsindirýinshe, klasıkalyq kıiz úı jeńil, jyljymaly jáne aǵashtan qurastyrylsa, anti yurt ádeıi oǵan qarama-qarsy: nysan korten bolatynan jasalǵan, monýmentaldy sıpatqa ıe jáne bólshekteletin qurylymdy qarastyrmaıdy.
Jobanyń avtory — cogarts búrosynda jumys isteıtin sáýletshi Bokeıhan Qamza. Sondaı-aq jobaǵa ulab sáýlet búrosynyń komandasy atsalysty. Qamzanyń aıtýynsha, joba ıdeıasy qurylystan bir jyl buryn paıda bolǵan. «Sol kezde men qarapaıym suraqqa jaýap bergim keldi: kıiz úı óz mánin joǵaltpaı zamanaýı bola ala ma? Biz formany uzaq izdedik, aqyrynda júzdegen korten elementteri kózqarasqa qaraı únemi ózgeretin sulbaǵa aınalatyn kompozısıa paıda boldy», — dedi ol.
Sáýletshilerdiń oıynsha, kıiz úıdiń birtutas sulbasy joq jáne kózqaras buryshyna qaraı pishinin ózgertip turady. Osyǵan baılanysty nysan keıde múldem joǵalyp ketetindeı, keıde birtindep kórinetindeı áser qaldyrady. Sondyqtan ony «eles» dep ataıdy.
Jasaýshylardyń ózderi úshin kútpegen jerden pavılon ishinde erekshe akýstıkalyq effekt paıda boldy. Kıiz úıdiń metal qurylymy dybysty shaǵylystyryp, jańǵyryq týdyrdy. «Ashylǵannan keıin adamdar birden pavılon ishinde tura bastady. Olar keshke deıin otyryp, án aıtty, sóılesti. Kórshi lagerden barabanshylar bir kúni kelip, ımprovızasıalanǵan konsert uıymdastyrdy», — dedi joba avtory.
Korten bolatynyń taǵy bir ereksheligi — ýaqyt óte kele onyń beti ózgerip, tabıǵı qorǵanysh patınamen qaptalady. Kıiz úı tán tot basqan qońyr qabatpen jabylyp, túsi men qurylymyn ózgertedi.
Buǵan deıin Kursiv LifeStyle alǵashqy qazaqstandyq delegasıanyń Blek-Rok shólindegi aty ańyzǵa aınalǵan Burning Man festıvalinde ulttyq kıiz úıdi tanystyrǵanyn jazǵan bolatyn. Kóshpendilerdiń baspanasy tipti qumdy daýylǵa tótep berdi.