Bıyl Qazaqstanda tirkelgen ekstremaldy temperatýra bolashaqta ádettegi qubylysqa aınalýy múmkin, dep habarlaıdy infohub.kz.
Buǵan deıin shilde aıyndaǵy aptap ystyq birneshe qalada temperatýra maksımýmyn jańartqany habarlanǵan bolatyn. Shymkentte 111 jyl boıy saqtalǵan rekord jańartylyp, ǵasyrda alǵash ret termometrler 45 gradýstan asty. Sondaı-aq Túrkistan men Almatyda da joǵary temperatýra tirkeldi.
Ádette klımatologtar temperatýra mánderin anomaldy dep ataýǵa asyqpaıdy, biraq bıylǵy jaz tipti mamandardy da tańǵaldyrdy. «Qazgıdromet» RMK baspasóz hatshysy Arýjan Muratovanyń aıtýynsha, temperatýra anomalıasy +2,96 gradýsty qurady, al eń jyly 10 jyldyń 9-y XXI ǵasyrǵa tıesili. Qazaqstanda jaz 2014 jyldan bastap qatarynan 12 jyl boıy normadan jyly boldy. Búkil el boıynsha 30 gradýstan joǵary temperatýra kúnderiniń sany artyp keledi, al batys jáne ońtústik aımaqtarda olardyń sany 10 jyl saıyn 4-7 táýlikke ósedi.
Sarapshylar aldaǵy jyldary da temperatýra rekordtary tirkelýi múmkin ekenin joqqa shyǵarmaıdy. Ońtústik aımaq turǵyndary qazirdiń ózinde mundaı ystyqqa áreń shydap júr.
Ystyqtan zardap shegip otyrǵan jalǵyz el Qazaqstan emes. Qyrǵyzstandaǵy klımatologtar Ortalyq Azıada temperatýra óse beretinin jáne búginde anomaldy bolyp kórinetin aptap ystyqtyń bolashaqta normaǵa aınalýy múmkin ekenin eskertedi. Klımatolog Zoıa Kretova: «Biz búginde tek Qyrǵyzstanda ǵana emes, búkil Ortalyq Azıada jáne búkil álemde baıqap otyrǵan eń aıqyn klımattyq qaýipterdiń biri — jyl mezgilderiniń yǵysýy. Jyldyń jyly kezeńi uzaryp keledi. Jaqsylyq kútýdiń qajeti joq. Temperatýra qalaı kóterilse, solaı kóterile beredi, tipti odan da qarqyndy» dedi.
Temperatýranyń kóterilýin ásirese Eýropa qatty sezinýde. Bıyl jazda Fransıa, Ispanıa, Portýgalıa, Germanıa, Belgıa jáne Ulybrıtanıada aýa raıy qaýiptiliginiń eń joǵary deńgeıi jarıalandy.