Apple kompanıasy iOS 27, iPadOS 27, watchOS 27, visionOS 27 jáne macOS 27 jańartýlaryn usynyp, sonymen qatar jasandy ıntellekt fýnksıalarymen jabdyqtalǵan Siri daýystyq kómekshisiniń jańa nusqasyn iske qosty. Qaı qurylǵylar jańartý alatynyn jáne olardyń qaısysynda jasandy ıntellekt agenti jumys isteıtinin infohub.kz saıty habarlady.
Basty jańalyq — jasandy ıntellekt fýnksıalary bar Siri. Kómekshi paıdalanýshynyń ártúrli qosymshalardaǵy jeke aqparatyna júginip, jaýap qurastyrý kezinde ekrandaǵy mazmundy eskeredi. Sonymen qatar Apple jeke Siri qosymshasyn tanystyrdy.
Ázirge jańa fýnksıa tek aǵylshyn tiline baptalǵan qurylǵylarda qoljetimdi. Qazan aıynda kompanıa fransýz, japon, koreı, portýgal jáne ıspan tilderin qosýdy josparlap otyr. Orys jáne qazaq tilderi tizimde ázirge joq. Eýroodaq elderinde jasandy ıntellektti Siri bastapqyda jumys istemeıdi.
iOS 27-de Liquid Glass dızaıny jańartylyp, fotosýretterdi óńdeýge arnalǵan jasandy ıntellekt quraldary, AirPods úshin ekvalaızer baptaýy jáne keńeıtilgen ata-analyq shekteýler qosyldy. Buǵan qosa, endi bir telefon nómirin eki iPhone-da paıdalanýǵa bolady. Apple málimdeýinshe, jańartýdan keıin qosymshalardyń iske qosylýy 30%-ǵa deıin jyldamdaýy múmkin.
iOS 27-ni iPhone 11 jáne odan jańa modelderdiń, sondaı-aq ekinshi jáne úshinshi býyndaǵy iPhone SE ıeleri ornata alady. Alaıda jańa Siri iOS 27-men úılesimdi barlyq qurylǵyda qoljetimdi emes. Fýnksıa iPhone 15 Pro, iPhone 15 Pro Max jáne barlyq iPhone 16 jáne odan jańa modelderde jumys isteıdi.
iPad-ta jasandy ıntellektti Siri-di A17 Pro chıpi bar iPad mini jáne M1 jáne odan jańa prosesorlary bar planshetter qoldaıdy. Mac-ta fýnksıa M1 jáne odan jańa chıpteri bar kompúterlerde qoljetimdi. Qoldaý Apple Vision Pro, Apple Watch Series 9 jáne odan jańa, Apple Watch Ultra 2 jáne odan jańa, sondaı-aq Apple Watch SE 3 úshin de jarıalandy.
Buǵan deıin Kursiv LifeStyle Qazaqstandaǵy Apple-dyń kúzgi jelisiniń baǵasy belgili bolǵanyn jazǵan edi.