Bıyl jazda Qazaqstan aptap ystyqtan qysylyp jatyr. Ońtústikte keı jerlerde temperatýra 40–45 gradýsqa deıin kóteriledi. Qurǵaqshylyq eginge zıan keltire me, al onyń saldary azyq-túlik baǵasyna áser ete me? Osy suraqtarǵa aýyl sharýashylyǵy vıse-mınıstri Azat Sultanov jaýap berdi, dep habarlaıdy infohub.kz saıty.
Azat Sultanovtyń aıtýynsha, eldiń ońtústiginde sýarý máselesi ázirge joq. Agrarılerge sý keste boıynsha berilip jatyr, sondyqtan Aýyl sharýashylyǵy mınıstrligi sýarmaly jerlerde ósiriletin kartop pen kókóniske qatysty alańdamaıdy. Astyq óńirlerinde jaǵdaı kúrdelirek. Degenmen Qostanaı men Soltústik Qazaqstan oblysynyń basym bóliginde jaýǵan jańbyr aptaptyń áserin jeńildetýge kómektesti.
«96% egistiktiń jaǵdaıy jaqsy jáne qanaǵattanarlyq dep baǵalanady. Óli egin joqtyń qasy. Aqmola jáne Qaraǵandy oblystary boıynsha qarap otyramyz. Naqty kórinis oraqqa jaqyndaǵanda kórinedi», — dedi Sultanov.
Sonymen qatar, vıse-mınıstrdiń qosýynsha, fermerler qurǵaqshylyqqa daıyndalǵan: olar ystyqqa tózimdi tuqym sorttary men mıneraldy tyńaıtqyshtardy paıdalanǵan.
ASHM moıyndaǵandaı, az egin ádette astyq baǵasyn kóteredi. Bul áleýmettik mańyzy bar ónimderdiń ózindik qunyna da áser etýi múmkin. Degenmen bılik nannyń kúrt qymbattaýyn ázirge kútpeıdi.
«Tórt jyl burynǵydaı tonnasy 180 myń teńge bolǵan kezde de, qazirgi 90 myń teńge baǵasynda da áleýmettik nan sórede 110 teńgeden satylýda. Bul baǵany saqtaý úshin memlekette barlyq qajetti tetikter bar. Sondyqtan nansyz qalamyz ba nemese nan qymbattaı ma dep alańdaý áli erte. Dúrbeleńniń qajeti joq», — dep vıse-mınıstr sendirdi.
Eger egin jaǵdaıy kúrt nasharlasa, baǵany tejeý sharalaryn qoldanatynyn aıtty.
Aýyl sharýashylyǵy mınıstrliginde qazir egistiktiń jappaı ólýi baıqalmaıtynyn aıtady. Aptaptyń eginge tıgizgen áserin tolyq baǵalaý oraq basyna jaqyndaǵanda múmkin bolady.