Amerıka Qurama Shtattary Palestına prezıdenti Mahmud Abbasqa Nú-Iorkte ótetin Birikken Ulttar Uıymy Bas Assambleıasynyń otyrysyna qatysýǵa múmkindik beretin vızany ekinshi jyl qatarynan bermedi, dep habarlaıdy infohub.kz saıty.
AQSh Memlekettik departamenti resmı saıtynda bas tartý sebepterin túsindirdi. «Memlekettik departament Kongreske Palestınany azat etý uıymy men Palestına avtonomıasy 1989 jylǵy PAEU mindettemelerin oryndaý týraly zańda jáne 2002 jylǵy Taıaý Shyǵystaǵy beıbitshilik mindettemeleri týraly zańda jazylǵan óz mindettemelerin taǵy da oryndamaǵanyn málimdedi. Mindettemelerdiń oryndalmaýy halyqaralyq uıymdarda buryn qabyldanǵan, Qaýipsizdik Keńesiniń 242 jáne 338 rezolúsıalaryn qoldaýǵa qatysty mindettemelerge qaıshy keletin áreketterdi bastaý men qoldaýdy, Izraıl-Palestına qaqtyǵysyn ınternasıonaldandyrý jónindegi áreketterdi, onyń ishinde Halyqaralyq qylmystyq sot pen BUU Halyqaralyq soty arqyly jasalǵan qadamdardy, birjaqty moıyndaýǵa qol jetkizý arqyly kelissózderdi aınalyp ótý áreketterin, sondaı-aq terrorısterge járdemaqy tóleýdi jalǵastyrýdy jáne jarıa málimdemeler men mektep oqýlyqtarynda terorızm aktileri men terrorısterdi dáripteýdi qamtıdy», — delingen syrtqy saıasat vedomstvosynyń habarlamasynda.
Osyǵan baılanysty Amerıka Qurama Shtattary Palestınany azat etý uıymynyń músheleri men Palestına avtonomıasynyń laýazymdy tulǵalaryna vıza berýge tyıym salatyn sanksıalardy keńeıtetini naqtylandy.
Anadolu agenttiginiń habarlaýynsha, 2025 jyly Palestına avtonomıasynyń prezıdenti Mahmud Abbas ta vıza bolmaǵandyqtan Bas Assambleıaǵa jeke qatysa almaı, jınalǵandarǵa onlaın rejımde sóz sóılegen.