AQSH-ta sot «Krokýs Sıtı Hol» teraktine jáne basqa da lańkestik áreketterge qatysy bar afǵan sodyry Muhammed Sharıfýllaǵa úkim shyǵardy. Bul týraly AQSh Ádilet mınıstrligi habarlady, dep jazady infohub.kz.
Vedomstvo málimetinshe, Qazaqstanda tyıym salynǵan IGIL («Islam memleketi») uıymynyń múshesi Muhammed Sharıfýlla lańkestik qurylymdy materıaldyq qoldaǵany jáne oǵan resýrs bergeni úshin 20 jylǵa bas bostandyǵynan aıyryldy.
AQSh Ádilet mınıstrliginiń dereginshe, 2024 jyldyń naýryzynda «Krokýs Sıtı Hol» terakti bolǵan kezde Sharıfýlla IGIL atynan shabýyldaýshylarǵa AK avtomaty men basqa da qarýdy qoldaný jóninde nusqaýlyq berip, shabýyl barysynda olarmen baılanysta bolǵan.
Sonymen qatar Sharıfýlla 2021 jyly AQSh áskerleri Aýǵanstannan shyǵarylǵan kezdegi Kabýldaǵy jarylysqa jáne basqa da birqatar lańkestik áreketterge qatysy bar.
2024 jyldyń 22 naýryzynda keshke Reseı FSB-sy Máskeý oblysyndaǵy Krasnogorsk qalasyndaǵy «Krokýs Sıtı Hol» ǵımaratynda atys pen órt bolǵanyn habarlady. Ol kezde munda «Pıknık» tobynyń konserti ótýi tıis edi. Tergeý komıteti terakt týraly qylmystyq is qozǵady.
24 naýryzda Reseıde jalpyulttyq aza tutý kúni jarıalandy. «Krokýstaǵy» zardap shekkender sany 551 adam, 144 adam qaza tapty.
Osy jyldyń naýryzynda sot «Krokýs Sıtı Hol» terakti isi boıynsha 19 aıyptalýshynyń 15-in ómir boıyna bas bostandyǵynan aıyrýǵa úkim shyǵardy — isti Ekinshi Batys okrýgtik áskerı sot qarady.