Amerıkalyq federaldyq bılik seısenbi kúni Reseı arnaıy qyzmetteri Ýkraınany qoldaıtyn AQSh pen Eýropa elderinde maqsatty túrde óltirý josparyn jasady dep málimdedi. İzdeýde júrgen bes adamǵa aıyp taǵyldy, dep habarlaıdy infohub.kz saıty.
Manhetten federaldyq sotynda jarıalanǵan aıyptaý qorytyndysynda arnaıy qyzmetter jelisi AQSH-ta jáne basqa da elderde adamdarǵa aqsha tólep, óltiriletin nysandardy baqylaýdy tapsyrǵany, keıin olardy óltirýdi josparlaǵany aıtylǵan.
Aıyptaý qujatynda jelige tartylǵan adamdarǵa Ýkraınamen odaqtas dep sanalatyn eýropalyq elderde azamattyq jáne áskerı ınfraqurylymǵa qarsy terorıstik áreketter jasaý da usynylǵany jazylǵan.
Nú-Iorktegi FBR basqarmasynyń jetekshisi Djeıms Barnakl-kishi FBR bul josparlardy «tynymsyz jumys arqyly» toqtatqanyn aıtty. Onyń aıtýynsha, reseılik arnaıy qyzmetterdiń músheleri men olardyń sybaılastary «AQSh aýmaǵynda jáne búkil álemde adamdardy qorqytýǵa, qaýip tóndirýge nemese óltirýge sóz baılasqan».
FBR-diń Vashıngtondaǵy keńsesiniń jetekshisi Darren Koks «birneshe FBR dalalyq keńseleriniń, bólimsheleriniń jáne seriktes vedomstvolardyń erekshe jumysyn» atap ótti. Ol Reseıdiń elimizdiń astanasynda jáne búkil AQSH-ta zorlyq-zombylyq áreketterin jasaýǵa tyrysqanyn birlesip toqtatqanyn jetkizdi.
Ol taratqan habarlamada qaýip alǵash anyqtalǵan kezde FBR-diń Vashıngtondaǵy dalalyq keńsesi men seriktesteri «jospardy buzýǵa jáne Reseı úkimetin óz áreketteri úshin jaýapkershilikke tartýǵa jedel kiriskeni» aıtylǵan.
Habarlamaǵa sáıkes, Reseı Federasıasynyń arnaıy qyzmetteri úshin jumys isteıtin adamdar jelisi keminde 2024 jyldan beri búkil álemde, sonyń ishinde AQSh aýmaǵynda shabýyldar men óltirýler jasaýǵa sóz baılasyp, olardy júzege asyrǵan.
Onda Reseı arnaıy qyzmetteriniń jelisi Reseı Federasıasynyń búkil álemde syrtqy shabýyldar, sonyń ishinde óltirý jasaýǵa arnalǵan apparatynyń «bir tarmaǵy» dep atalǵan.
Buǵan deıin jeli reseılik dıssıdentter men qashqyndarǵa nazar aýdarǵany, al sońǵy kezde Ýkraınanyń odaqtastary dep sanalatyn elderdi nysanaǵa alǵany habarlanǵan.
Jaqynda jeli músheleri AQSH-ta birneshe adamdy tartýǵa tyrysqan.
Bılik ókilderiniń aıtýynsha, jeli bıyl jazda AQSH-ta turatyn bir adamdy AQSH-ta turady dep eseptelgen belgili reseılik dıssıdentti baqylaýǵa jáne óltirýge tartqan.
Aıyptaý qujatynda «US Resident-1» dep qana kórsetilgen adam nysanaǵa alynǵan qurbanmen baılanysty eki orynǵa jiberilip, oǵan «baqylaýdy qalaı júrgizý kerektigi týraly naqty nusqaýlar» berilgeni, bul jumys úshin 1 000 jáne 1 500 dollar ýáde etilgeni jazylǵan.
Baqylaý júrgizip, aıyptalýshylardyń birine nysanaǵa alynǵan qurbanmen baılanysty oryndardyń birneshe fotosýreti men beınejazbasyn bergennen keıin, AQSH-ta turatyn adam nysanany óltirý arqyly «joıý» nemese «joǵaltý» úshin usynylǵan 40 000 dollardan bas tartqan.
Usynys qabyldanbaǵan soń, ony jasaǵan arnaıy qyzmet múshesi AQSH-taǵy birneshe basqa adamdy osy jumysqa aıtarlyqtaı aqsha usynyp tartýǵa tyrysqan, delingen aıyptaý qujatynda.