Amerıka Qurama Shtattary qyrkúıek aıynyń sońyna deıin Irak aýmaǵynan áskerı kontıngentin tolyq shyǵaryp, Taıaý Shyǵystaǵy osy eldegi jıyrma jyldyq áskerı qatysýyn toqtatpaq. Bul týraly infohub.kz saıty habarlaıdy.
Deutsche Welle agenttiginiń málimetinshe, 30 qyrkúıekte AQSh Irakta qalǵan 2 500 áskerı qyzmetkerin shyǵaryp bitirýi tıis. Tıisti kelisim 2024 jyly jasalǵan bolatyn.
«1 qazan Irak memleketi tarıhyndaǵy jańa kúnge aınalady. Osy kúni el kez kelgen sheteldik áskerı qatysýdan arylyp, óz aýmaǵynda ulttyq egemendik ornaıdy», — dedi Irak premer-mınıstri Álı áz-Zeıdı.
Bul oqıǵany Táýelsizdik kúni retinde atap ótý josparlanyp, ol tórt resmı memlekettik merekemen qatar júrmek.
Basylymnyń jazýynsha, áskerdi shyǵarý AQSH-tyń Iraktaǵy jıyrma jyldan astam áskerı qatysýynyń aıaqtalýyn bildiredi. 2003 jyly AQSh basyp kirgennen keıin amerıkan áskerleri 2011 jyly shyǵarylǵan, alaıda 2014 jyly «Islam memleketi» tobyna qarsy kúresý úshin qaıta oralǵan. Áskerdi shyǵarý sonymen qatar AQSH-tyń Taıaý Shyǵystaǵy qatysýyn qysqartý jónindegi keń aýqymdy strategıasynyń bir bóligi.
South China Morning Post gazetiniń jazýynsha, Irakta amerıkan áskerleriniń túpkilikti shyǵarylýyn bári qoldamaıdy, ony merziminen buryn dep sanaıdy.
«Bizdiń oıymyzsha, Irak qaýipsizdikti qamtamasyz etý jaýapkershiligin tolyq óz moınyna alýǵa áli daıyn emes», — dedi Fallýdjadaǵy súnnıttik taıpa kósemi Abdýlrahman ál-Zobaı.