Amerıka Qurama Shtattary men Iran Islam Respýblıkasy dúısenbide, 28 qyrkúıekte janama kelissózderdiń kezekti kezeńin ótkizýi múmkin. Bul týraly aımaqtaǵy eki derekkózge silteme jasaǵan Axios portaly habarlady. Al AQSh prezıdenti Donald Tramp basylymǵa bergen suhbatynda Tegeranmen baılanysty osy aptada jalǵastyrýǵa úmittenetinin málimdedi, dep jazady infohub.kz.
Axios málimetinshe, taraptar arasynda deldaldyq róldi áli de Katar atqaryp otyr. Dúısenbide-aq qatarlyq ókilder Irannyń syrtqy ister mınıstri Abbas Arakchımen jáne AQSh prezıdentiniń arnaıy ókili Stıv Ýıtkoffpen jeke kezdesýler ótkizýi yqtımal. Alaıda kelissózderdiń jańa kezeńiniń naqty kúni ázirge rastalǵan joq.
«Men osy aptada Iranmen jańa kelissózderdi kútip otyrmyn. Olar kelisim jasasqysy keledi, biraq maǵan qajet kelisimdi emes, basqasyn usynyp otyr», — dep keltiredi Axios Tramptyń sózderin.
Amerıka prezıdenti Iranǵa soqqy berýdi qaıta bastaý nusqasyn da qarastyryp jatqanyn ańǵartty. Jýrnalısiń tıisti saýalyna jaýap bere otyryp, ol «bul týraly árdaıym oılaıtynyn» aıtty.
Aldyńǵy janama kelissózder ótken aptada Nú-Iorkte, Birikken Ulttar Uıymy Bas Assambleıasynyń alańynda ótken bolatyn. Oǵan Arakchı, Ýıtkoff jáne Djared Kýshner qatysyp, qatarlyq ókilder ırandyq jáne amerıkandyq taraptar arasynda habarlama jetkizip otyrdy.
Tegeran bir apta ishinde Ormýz buǵazyn ashyp, ıadrolyq baǵdarlama boıynsha kelissózderdi qaıta bastaýdy usyndy. Buǵan AQSh teńiz blokadasyn alyp tastap, ıran munaıyn satýǵa qoıylǵan shekteýlerdi joıyp, aımaqtaǵy atysty toqtatý rejımin qalpyna keltirýi shart. Tramp bul usynystan bas tartqanyn habarlady. Vashıngton Irannyń ıadrolyq máseledegi jeńildikterin talap etip otyr, al Tegeran kelissózderdi Ormýz buǵazy men amerıkandyq blokadaǵa shoǵyrlandyrǵysy keledi.
Tramptyń bas tartýyna qaramastan, deldaldar eki tarappen de yqtımal ymyrany talqylaýdy jalǵastyryp otyr. Arakchı Iran dıplomatıalyq sheshimge múddeli ekenin jáne AQSH-tyń deldaldar arqyly resmı jaýabyn kútip júrgenin málimdedi.