АҚШ президенті Дональд Трамптың командасы Иранға әскери шабуылдарды қайта бастау мүмкіндігін талқылап жатыр. Қарастырылып отырған сценарийлердің бірі — 9 қарашада, жаңа ай кезеңінде соққы беру, деп хабарлайды infohub.kz сайты.
Fox News телеарнасының дерегінше, Дональд Трамп Иранға қарсы әскери операцияларды қайта бастау мүмкіндігін талқылау үшін ұлттық қауіпсіздік жөніндегі командасымен кездесті. Бұл ақпаратты телеарнаға жоғары лауазымды шенеуніктер растады. Олардың айтуынша, тиісті кеңестер сәрсенбі және бейсенбі күндері Ақ үйде өткен.
«9 қарашада Таяу Шығыста жаңа ай басталады — ай жарығы іс жүзінде болмайтын кезең, бұл әскери операцияларды жүргізуге қолайлы жағдай жасайды», — деп келтіреді телеарна өз дереккөздерін.
Бұған дейін Трамп журналистерге Ақ үй соғыс қимылдарын қайта бастау туралы шешім қабылдап жатқанын айтқан. «Әрі қарай барып, Иранның ядролық бағдарламасын түпкілікті жою және мұндай жағдайдың ешқашан қайталанбауына кепілдік беру үшін соққы беру керек пе? Мүмкіндігінше елдің қалған бөлігін жоймауды қалар едім, бірақ мүмкін солай істеуге тура келер. Жақында білесіздер», — деп сұрақ қойды Трамп және өзі жауап берді.
Бірқатар дереккөз американдық шенеунікке сілтеме жасап, АҚШ Орталық командованиесі Иранда ауқымды операцияларды ықтимал қайта бастауға дайындықты аяқтап жатқанын, алайда Вашингтоннан әзірге жаңа нұсқау алмағанын хабарлайды.
Сонымен қатар, бейсенбі күні телефон арқылы сөйлесу барысында Ирак премьер-министрі Али Фалех аз-Зайди Трампқа ирак аумағы көрші мемлекеттерге соққы беру үшін пайдаланылмауы керектігін мәлімдеді.