Amerıka Qurama Shtattary Iranǵa jańa usynys jasady: Vashıngton Tegerandy ıadrolyq otynmen qamtamasyz etýge daıyn, biraq ol úshin Iran óziniń ýran baıytý baǵdarlamasynan bas tartýy tıis. Bul týraly Bloomberg agenttigine bergen suhbatynda AQSh energetıka mınıstri Krıs Raıt aıtty, dep habarlaıdy infohub.kz saıty.
«Biz (Iranǵa — red. esk.) (ıadrolyq — red. esk.) otyndy shetelden jetkize alamyz. Olar qaıtadan ulttar qaýymdastyǵyna qosylyp, halqyna beıbitshilik pen órkendeý ákele alar edi», — dedi Raıt.
Onyń aıtýynsha, Amerıka Qurama Shtattary óziniń ýran jetkizý tizbegin qurýdy is júzinde aıaqtaǵan. Energetıka mınıstri óz vedomstvosy ýran óndirý jáne seriktestik qarym-qatynas salasyndaǵy uzaq merzimdi kelisimderdi daıyndaýdy aıaqtap jatqanyn atap ótti.
«Biz kelissóz júrgizýdi qalaımyz. Áıtpese olar ózderiniń jasyryn, qupıa, jabyq ıadrolyq qarý jasaý baǵdarlamasyn jalǵastyryp, amerıkalyq áskerılerge qarsy tura alady. Bul olardyń ıadrolyq qarý jasamaıtynyna kepildik beredi», — dep qosty Raıt.
Sonymen qatar AQSh Energetıka mınıstrliginiń basshysy munaı naryǵynyń qatysýshylaryn Ormýz buǵazyndaǵy ahýalǵa qatysty shamadan tys optımızmnen saqtandyrdy. Onyń aıtýynsha, jaqyn arada Iranmen qarym-qatynasta dıplomatıalyq serpilis kútýge bolmaıdy. Qazirgi tańda buǵaz arqyly táýligine shamamen 10 mln barel munaı men munaı ónimderi ótedi, bul balamaly qubyrlardy eskergende daǵdarysqa deıingi kólemniń úshten ekisin ǵana quraıdy. Mınıstr álemdik energıa tasymaldaýshylar naryǵynyń qazirgi jaı-kúıi asa turaqsyz jáne kúrdeli bolyp qala beretinin atap ótti.
Eske salaıyq, buǵan deıin Donald Tramp Iranda eshqashan ıadrolyq qarý bolmaıtynyn málimdep, Ormýz buǵazy ashylmasa, jańa soqqylar jasalatynyn eskertken bolatyn.