21–25 qyrkúıek aralyǵynda Qazaqstanda halyqaralyq ushý qaýipsizdigin baǵalaý ótedi. Tekserýdi AQSh ókilderi júrgizedi. Bul kezeń Qazaqstannan AQSH-qa tikeleı reıster ashý týraly eki jylǵa sozylǵan kelissózderdegi sheshýshi qadam bolmaq, dep habarlaıdy infohub.kz saıty.
Amerıkalyq ınspektorlar respýblıkada ushý qaýipsizdigine qalaı kóńil bólinetinin baǵalaıdy. Tekserý avıasıalyq zańnamany, ushqyshtardy daıarlaýdy jáne ushaqtardyń tehnıkalyq jaı-kúıiniń IKAO halyqaralyq standarttaryna sáıkestigin qamtıdy.
«Sarapshylar tobynyń quramynda halyqaralyq avıasıalyq quqyq, avıasıalyq personaldy lısenzıalaý, ushýǵa jaramdylyq jáne ushý paıdalaný mamandary bar», — dep atap ótti Qazaqstan Respýblıkasynyń Kólik mınıstrliginde.
Sonymen qatar 24 qyrkúıekte AQSH-tan kelgen mamandar Air Astana avıakompanıasyna tehnıkalyq sapar jasaıdy. Atalǵan kompanıa AQSh Kólik mınıstrliginen komersıalyq qyzmetke ruqsat alýǵa ótinim bergen. Komısıa avıatasymaldaýshynyń prosesteriniń ashyqtyǵyn tekseredi.
Tekserý aıaqtalǵan soń amerıkandyq tarap brıfıń ótkizip, tekserý nátıjeleri boıynsha jazbasha esep usynady.
Bul kezeńnen sátti ótý Qazaqstan men AQSh arasynda tikeleı reısterdiń ashylýyn jaqyndatady.
Buǵan deıin «Kýrsıv» Air Astana Qazaqstannan Nú-Iork pen Tokıoǵa tikeleı reısterdi oryndaýǵa josparlap otyrǵan alǵashqy Boeing 787 Dreamliner ushaqtary respýblıkaǵa 2026 jyldyń jeltoqsanynda keletinin jazǵan bolatyn.