Qytaı men AQSh jalpy quny shamamen 60 mıllıard dollarlyq taýarlarǵa ózara keden bajyn azaıtýǵa kelisti. Bul ýaǵdalastyq Qytaı tóraǵasy Sı Szınpın men AQSh prezıdenti Donald Tramptyń Vashıngtondaǵy kezdesýiniń nátıjesinde jasaldy, dep habarlaıdy infohub.kz saıty.
Reuters agenttiginiń málimetinshe, kelisilgen tizimderge amerıkandyq azyq-túlik pen qytaılyq turmystyq taýarlar engen. Jańa mólsherlemeler eki el de qajetti ishki rásimderdi aıaqtaǵannan keıin qoldanyla bastaıdy.
Ár memleket ımportqa salynatyn bajyn shamamen 30 mıllıard dollarǵa azaıtady. Qytaı Saýda mınıstrliginiń dereginshe, kelisilgen tizimdegi taýarlardyń 90%-dan astamy qosymsha ózara bajdardan bosatylady. Alaıda vedomstvo jańa mólsherlemelerdiń kúshine enetin kúnin ázirge ataǵan joq.
Qytaı amerıkandyq júgeri, bıdaı, sorgo, et, sút ónimderi, balyq jáne teńiz ónimderine baj salyǵyn tómendetýdi josparlap otyr. Tizimde sondaı-aq aǵash, kosmetıka jáne medısınalyq buıymdar bar. AQSH-tyń Qytaıǵa eksportyndaǵy negizgi taýarlardyń biri — soıa burshaǵy tizimge enbedi.
AQSh óz tarapynan qytaılyq kofeqaınatqyshtar, tosterler, ydys-aıaq, kórpe, tósek jabdyǵy men oıynshyqtarǵa baj salyǵyn azaıtýdy usynyp otyr. Tizimde balalarǵa arnalǵan avtokreslolar men merekelik bezendirýler de bar.
Baj jónindegi ýaǵdalastyq eki el basshylarynyń kezdesýiniń nátıjeleriniń biri boldy. Taraptar sondaı-aq saýda bitimin eki aıǵa — 2027 jylǵy 10 qańtarǵa deıin uzartty. Ol tarıftik jáne ózge de saýda sharalarynyń bir bóligin toqtata turýdy kózdeıdi.
Qytaı Saýda mınıstrligi kelisimdi uzartý elderge qol jetkizilgen ýaǵdalastyqtardy baǵalaýǵa jáne kelissózderdi jalǵastyrýǵa ýaqyt beretinin eseptep otyr. Vedomstvonyń aıtýynsha, bul kompanıalar úshin «salystyrmaly túrde turaqty ári boljamdy jaǵdaı» jasaıdy.
AQSh sondaı-aq Qytaıdyń 2027 jáne 2028 jyldary jyl saıyn keminde 10 mıllıon tonna amerıkandyq kómir satyp alatynyn málimdedi. Elder 2026 jyldyń sońyna deıin aýyl sharýashylyǵy ónimderi saýdasy jónindegi jumys tobynyń alǵashqy otyrysyn ótkizýdi josparlap otyr.