Amerıka Qurama Shtattarynyń quqyq qorǵaý organdary jeksenbi kúni Kalıfornıa shtatynyń turǵynyn ustady. Ol Qytaı sheneýnikteriniń tapsyrmasymen Taıvan prezıdentiniń ulyn baqylady dep aıyptalyp otyr, dep habarlaıdy infohub.kz saıty.
Federaldyq tergeý búrosynyń málimdemesine súıensek, Vanın Chjan (Hızer esimimen de tanymal) Los-Andjelestiń halyqaralyq áýejaıynda Qytaıǵa ushpaq bolǵan sátte qolǵa túsken. Kalıfornıa shtatynyń Irvaın qalasynda turatyn 34 jastaǵy áıelge tirkelmegen sheteldik agent retinde áreket etti degen aıyp taǵyldy.
Federaldyq tergeý búrosy Chjan Taıvan prezıdenti Laı Chın-teniń ulyn baqylaǵan dep málimdedi. Agenttik aıyptalýshynyń nysanasyn tikeleı atamaǵanymen, keıinnen New York Post basylymynyń materıalyna silteme jasap, ony AQSH-ta turatyn Laı Tın-úı dep anyqtady.
Taıvan prezıdentiniń keńsesi Chjannyń áreketin «transulttyq qysymnyń tıptik mysaly» dep sıpattap, Taıvan azamattaryn qorǵaǵany úshin AQSh úkimetine alǵys aıtty.
«Bizdiń elimiz adam quqyqtary men memleketterdiń egemendigin elemeıtin osyndaı jabaıy áreketterdi barynsha qatań aıyptaıdy», — dedi keńse ókili Karen Kýo.
Qytaı Syrtqy ister mınıstrligi pikir suraǵan ótinishke jaýap bermedi.
Amerıka Qurama Shtattarynyń Ádilet mınıstrligi Chjan 2025 jyly Qytaı sheneýnikteriniń nusqaýymen Sıetlge baryp, olarǵa Taıvan prezıdentiniń uly men onyń otbasynyń sýretterin, beınejazbalaryn jáne kólik nómirleri týraly málimetterdi jibergen dep aıyptady.
Kalıfornıa ortalyq okrýgi boıynsha AQSH-tyń birinshi asıstent prokýrory Bıll Essaılıdiń málimdemesinde Chjan baıqalmaý úshin arnaıy tásilderdi qoldanǵany jáne sheteldik úkimettiń atynan áreket etip jatqanyn Vashıngtonǵa habarlamaǵany aıtylǵan.
Chjannyń qorǵaýshysy bar-joǵy ázirge belgisiz. Essaılıdiń aıtýynsha, ol dúısenbi kúni Los-Andjelestiń federaldyq sotyna keledi.
Laı men onyń Demokratıalyq progresıvti partıasy Taıvandy Qytaıdan bólek qarastyrady. Bul ustanym araldy Qytaı aýmaǵy dep sanaıtyn Beıjińdi jıi ashýlandyrady. Laı Taıvan halqynyń ǵana óz bolashaǵyn sheshýge quqyly ekenin aıtady.
Vashıngtonnyń Taıvanmen resmı dıplomatıalyq qatynasy joq. Degenmen Amerıka Qurama Shtattary araldyń eń mańyzdy halyqaralyq qoldaýshysy ári qarý-jaraq jetkizýshisi sanalady.