Aqtaýda bir jarym jasar balany qaǵyp óltirgen burynǵy polısıa qyzmetkerine sot úkim shyǵardy: ol 1 jyl 6 aıǵa bas bostandyǵynan aıyryldy, dep habarlaıdy infohub.kz saıty.
Mańǵystaý oblystyq sotynyń málimetinshe, Aqtaý qalalyq sotynyń úkimimen sottalýshy Qazaqstan Respýblıkasy Qylmystyq kodeksiniń 345-babynyń 3-bóliginde kózdelgen quqyq buzýshylyqty jasaǵany úshin kináli dep tanyldy. Bul bap kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýyn qarastyrady.
Bas bostandyǵynan aıyrýmen qatar, sottalǵan adam 5 jylǵa kólik quralyn basqarý quqyǵynan aıyryldy.
Zıandy óteý máselesi sottan tys tártippen sheshildi. Úkim zańdy kúshine endi.
Eske salaıyq, osy jyldyń mamyr aıynda Aqtaýdaǵy bir aýlada bir jarym jasar bala qaǵylyp óltirilgen bolatyn. Qyzmettik kóliktiń rólinde polıseı otyrǵan, ol ýaqytsha ustaý ızolátoryna qamaldy.
Anyqtalǵandaı, sábı alańda ákesimen oınap júrgen. Bir sátte er adam alańdap ketkende, bala júris bóligine júgirip shyqqan. Sol kezde júrgizýshi keıin sheginip bara jatyp, balany baıqamaı qalǵan — soqtyǵysý saldarynan sábı jol-kólik oqıǵasy ornynda kóz jumdy.