Aqtaýdaǵy 15-shaǵyn aýdanda aýqymdy jóndeý jumystary júrip jatyr. Turǵyn úılerdiń aýlalary jańartylyp, 31 myń sharshy metr jańa asfált tóseldi.
Bul týraly Infohub.kz aqparat agenttigi habarlaıdy.
Jumystar №45, 46, 47 jáne 55-úılerdiń aýlalarynda atqarylýda. Eki qabatty asfált tóselýi nátıjesinde joldar tegistelip, kólik júrgizýshileri men jaıaý júrginshiler úshin yńǵaılylyq artty. Joba boıynsha barlyǵy 82 myń sharshy metr aýmaq jańartylmaq. Qalǵan bóligi kezeń-kezeńimen aıaqtalady.
Jaryqtandyrý jáne demalys aımaqtary
Aýdan aýmaǵynda jaryqtandyrý máselesi de sheshimin tabýda. Josparlanǵan 296 baǵannyń 190-y ornatylyp, qarańǵy ýaqytta qaýipsizdik artty. Sondaı-aq, balalar oıyn alańdary men sporttyq nysandardyń qurylysy júrgizilýde.
«Jumystar júıeli túrde atqarylýda», - deıdi merdiger uıym ókili Abaı Jolanbaev.
Jańartylǵan aýlalarǵa oryndyqtar men qoqys jáshikteri ornatylýda. Qalalyq ortany jaıly etý jumystary jalǵasýda.