Aqtóbe qalasyndaǵy Almaty aýdanynyń ákimi bolyp Muqanbetqalı Esenǵalıev taǵaıyndaldy. Buǵan deıin ol Aqtóbe oblysy ákimi apparaty basshysynyń orynbasary qyzmetin atqarǵan, dep habarlaıdy infohub.kz saıty.
Almaty aýdany ákimdiginiń Instagram-daǵy resmı paraqshasynda jazylǵandaı, jańa ákimdi qalalyq máslıhat depýtattary men ujymǵa Aqtóbe basshysy Azamat Beket tanystyrdy.
Muqanbetqalı Esenǵalıev 1987 jyly dúnıege kelgen. Ol eki joǵary bilimge ıe. Jubanov atyndaǵy Aqtóbe memlekettik ýnıversıtetin «memlekettik jáne jergilikti basqarý» mamandyǵy boıynsha, sondaı-aq Qazaq-Orys halyqaralyq ýnıversıtetin «quqyqtaný» mamandyǵy boıynsha bitirgen.
Eńbek jolyn Aqtóbe qalasynyń ekonomıka jáne qarjy bóliminde bas maman jáne sektor meńgerýshisi, Aqtóbe qalasynyń kásipkerlik bóliminde sektor meńgerýshisi, Aqtóbe oblysy ákimi apparatynda bas maman jáne bas ınspektor qyzmetterinde bastaǵan. Ár jyldary Hromtaý aýdany ákimi apparatynyń basshysy, Aqtóbe oblysy ákimi apparatynyń uıymdastyrý-baqylaý jumysy bóliminiń basshysy, Aqtóbe oblysy ákimi apparaty basshysynyń orynbasary laýazymdaryn atqarǵan.
Kezdesý barysynda Almaty aýdanynyń jańa ákimi Muqanbetqalı Esenǵalıev ózine kórsetilgen senimdi aqtaý jáne júktelgen mindetterdi sapaly oryndaý úshin bar kúshin salatynyn aıtty.