Aqtóbe oblysy Shalqar aýdany Begimbet aýylyndaǵy balabaqshada tárbıeshiniń kómekshisi uıyqtap jatqan bir jarym jasar balanyń betin tyrnap ketti. Oqıǵany beınebaqylaý kameralary túsirip alǵan, dep habarlaıdy infohub.kz saıty.
Jazbada balabaqsha qyzmetkeriniń uıyqtap jatqan bir jarym jasar sábıge jaqyndap, betin tyrnap, bólmeden shyǵyp ketkeni kórinedi. Sońǵy 17 jyl boıy mektepke deıingi mekemede jumys istep júrgen eresek adamdy ne ıtermelegenin qazir polıseıler anyqtap jatyr.
Kámeletke tolmaǵan balany tárbıeleý jónindegi mindetterdi oryndamaý nemese tıisinshe oryndamaý faktisi boıynsha qylmystyq is qozǵalǵany belgili. Tergeý áreketteri júrgizilip, beınebaqylaý kameralarynyń jazbalary alyndy.
Aýdandyq bilim bóliminiń málimetinshe, balabaqshada 25 bala tárbıelenedi.
«Oqıǵadan keıin arnaıy komısıa qurylyp, tekserý júrgizilýde, sot-medısınalyq saraptama taǵaıyndaldy. Oqıǵaǵa qatysy bar qyzmetker osy mekemede 2009 jyldan beri jumys isteıdi. Qazirgi tańda ol mindetterin oryndaýdan shettetildi. Bilim mekemesinde bolǵan oqıǵaǵa baılanysty ókinish bildiremiz. Jaǵdaı baqylaýda», — dedi Shalqar aýdanynyń bilim bóliminiń basshysy Aıan Bashanov.