Aqtóbede «Zamanaýı hırýrgıanyń ózekti máseleleri» atty halyqaralyq qatysýmen respýblıkalyq ǵylymı-praktıkalyq konferensıa ótti. Oǵan Qazaqstannyń jetekshi hırýrgteri, ǵalymdary men medısına qaýymdastyǵynyń ókilderi, sondaı-aq Belarýs, Túrkıa, Ońtústik Koreıa, Ózbekstan jáne Qyrǵyzstannan kelgen mamandar qatysty, dep habarlaıdy infohub.kz saıty.
Konferensıaǵa qatysýshylardy quttyqtaǵan Aqtóbe oblysynyń ákimi Asqat Shaharov hırýrgıany damytý tek zamanaýı tehnologıalar men jabdyqtardy ǵana emes, sonymen qatar bilikti mamandardy daıarlaýdy talap etetinin atap ótti.
«Bul konferensıa – tájirıbe almasýdyń alańy ǵana emes, hırýrgıanyń qazirgi jaǵdaıy men ony odan ári damytý baǵyttary týraly mańyzdy kásibı dıalog. Memleket basshysy Qasym-Jomart Toqaevtyń tapsyrmasymen densaýlyq saqtaý júıesin damytýǵa erekshe kóńil bólinýde. Sońǵy 3 jylda Aqtóbe oblysynda salaǵa 20,3 mlrd teńge baǵyttalyp, 40 medısınalyq nysan salyndy, taǵy 40 ǵımaratqa kúrdeli jóndeý júrgizildi. Óńir úshin hırýrgıalyq qyzmetti damytý, zamanaýı tehnologıalardy engizý, mamandardyń biliktiligin arttyrý jáne medısınalyq kómek sapasyn qamtamasyz etý erekshe mańyzǵa ıe. Oblys stasıonarlarynda jyl saıyn shamamen 50 myń pasıentke hırýrgıalyq kómek kórsetilip, 12 myńnan astam ota jasalady. Medısınalyq kadrlardy daıarlaý men ǵylymdy damytýda Marat Ospanov atyndaǵy Batys Qazaqstan medısına ýnıversıtetiniń róli zor, al halyqaralyq yntymaqtastyq dárigerlerimizge ozyq sheteldik tájirıbeni meńgerýge múmkindik beredi. Búgin Aqtóbede jınalǵan Qazaqstannyń jetekshi hırýrgteri men sheteldik mamandardyń kásibı tájirıbesi óńirdiń hırýrgıalyq qyzmetin odan ári damytýǵa jańa serpin beretinine senimdimin», – dedi Asqat Shaharov.
Konferensıa aıasynda medısına men hırýrgıany damytýǵa eleýli úles qosqan mamandardy marapattaý rásimi ótti. «Aqtóbe oblysyn damytýǵa qosqan úlesi úshin» tósbelgisimen Bashkent ýnıversıtetiniń profesory Mehmet Haberal (Túrkıa), akademıkter ári profesorlar Jaqsylyq Doskalıev pen Bolatbek Baımahanov, profesor Salım Berkimbaev, sondaı-aq medısına ǵylymdarynyń doktory, profesor Qaırat Sabyr marapattaldy.
Aqtóbe oblysy ákiminiń Qurmet gramotalarymen Qazaqstan men shetelden kelgen taǵy 10 maman marapattaldy. Olardyń qatarynda Ózbekstan, Qyrǵyzstan, Belarýs, Astana, Almaty, Semeı, Qyzylorda jáne Tarazdan kelgen tanymal hırýrgter men ǵalymdar bar. Marapattar hırýrgıalyq qyzmetti, medısına ǵylymyn, halyqaralyq yntymaqtastyqty jáne ǵylymı-praktıkalyq baılanystardy damytýǵa qosqan úlesi úshin berildi.
Konferensıanyń negizgi baǵdarlamasy plenarlyq otyrystarmen jalǵasty. Bir alańda medısınanyń túrli salalarynyń mamandary: hırýrgıa, transplantologıa, onkologıa, tamyr jáne kardıohırýrgıa ókilderi jınaldy. Olar kásibı tájirıbe almasyp, zamanaýı jetistikter men ǵylymı ázirlemelerdi tanystyrdy, sondaı-aq hırýrgıalyq qyzmetti damytý jáne medısınalyq praktıkaǵa jańa tásilderdi engizý perspektıvalaryn talqylady.
İs-sharaǵa onlaın formatta Seýl ulttyq ýnıversıtetiniń profesory Kvang Výng Lı de sóz sóıledi. Ol buǵan deıin qazaqstandyq mamandarmen transplantologıa salasynda jumys istegen. Óz sózinde ol dárigerler arasyndaǵy halyqaralyq ózara is-qımyl men tájirıbe almasýdyń mańyzdylyǵyn atap ótti.
Konferensıa qorytyndysy boıynsha qatysýshylar hırýrgıalyq kómekti jetildirý, kásibı quzyretterdi damytý jáne zamanaýı medısınalyq tehnologıalardy engizýge baılanysty odan ári jumys baǵyttaryn belgiledi. Mundaı kezdesýler kásibı baılanystardy nyǵaıtýǵa jáne óńirdiń hırýrgıalyq qyzmetin odan ári damytýǵa yqpal etedi.