Aqtóbe oblysynda polısıa qyzmetkerleri arnaıy jasaqtyń qoldaýymen jeke úıde tintý júrgizip, esirtkilik ósimdikterdi zańsyz ósirýdiń jolyn kesti, dep habarlaıdy infohub.kz saıty.
Oblystyq polısıa departamentiniń baspasóz qyzmeti málim etkendeı, esirtkilik ósimdikterdi zańsyz ósirý faktisin Temir aýdanynyń polıseıleri anyqtady.
«Shubarshı aýylyndaǵy jeke úıdiń birinde tintý barysynda polıseıler esirtkilik ósimdikter ósirilgen, arnaıy daıyndalǵan jer telimderin tapty. Barlyǵy alty kók ósimdik butasy anyqtaldy. Sonymen qatar úıdiń ártúrli bólmeleri men monshadan ósimdik zaty, tuqymdar, sondaı-aq zat saqtalǵan buıymdar men qaptamalar tabyldy. Tárkilengen ósimdik zatynyń jalpy salmaǵy shamamen 11 kelini qurady. Barlyq tárkilengen zat tıisti saraptamaǵa jiberildi», — dedi Aqtóbe oblysy PD-de.
Sotqa deıingi tergeý barysynda er adam aǵymdaǵy jyldyń kókteminde aýlada jerge arnaıy shuńqyrlar qazyp, oǵan esirtkilik ósimdiktiń tuqymyn ekkeni anyqtaldy. Keıin ol ósimdikterdi sýaryp, ósirgen, ony jeke tutyný úshin jasaǵanyn túsindirdi.
Jaýap alý kezinde er adam kinásin moıyndady. Osy fakti boıynsha QR QK 300-babynyń 1-bóligimen qylmystyq is tirkeldi.
Qazirgi tańda qylmystyq is boıynsha qajetti tergeý sharalary júrgizilýde.