Araq – aqyl‚ mastyq – oı, jar – haqıqat‚
Jan – nápsi, shataq ıman – din qıanat.
Maskúnem‚ áıelsúıgish‚ dinsiz ǵoı dep,
Syrym bilmeı syrtymnan qylma ǵaıbat.
Haqıqattan basqaǵa bas urmaımyn,
Dálelsizge nanam dep bolmaımyn mat.
Bastaǵy kóz‚ qulaqqa senimim joq,
Tereń oı men aqylǵa aıtamyn dat.
Paıǵambar, áýlıe aıtty dese-daǵy,
Aqyl qabyl almasa, ol maǵan jat.
Shataq dinge, ádetke ne bilgishke
Noqtalatpaı oıymdy qylam azat.
«Aqylǵa bıletpegen pende – aıýan»‚
Desem de bola qoımas sózim aǵat.
Qurannyń shyn maǵynasyn shataq uǵyp,
Moldalar maǵan qoımaq kápir dep at.
«Aqylyńa synat,– dep,– dálel aıtqan»
Qurannan tabylady talaı aıat.
Tápsir dep qasıetin talqan qylyp,
Buzǵanmen Quran bolmas adasqan hat.
Jaryq nurdan jaralǵan Kún joǵalmas,
Betine perde japsań neshe qabat,
Quran syryn uǵa almaı buzsa-daǵy,
Jasyrylmaı jarqyrap tur kárámat.
Jaman tápsir jaıylyp jer júzine‚
Din dese tura qashty esti azamat.
Bar obaly olardyń tápsirshide,
Adasyp nurly aıatqa jaǵypty tat.
Ol qateni túzetken álimder kóp,
Sonyń sózin oqysam, bolamyn shat.
Qıanatyń bar bolsa‚ ımanyń joq,
Maǵan dese, myń jyldaı qyl ǵıbadat.
 

---