Máskeýde Ýkraına prezıdenti keńsesiniń burynǵy keńesshisi Alekseı Arestovıchke syrttaı úkim shyǵaryldy: ol terorızmge shaqyrǵany jáne Reseı Qarýly Kúshteri týraly jalǵan aqparat taratqany úshin kináli dep tanylyp, 11 jylǵa bas bostandyǵynan aıyryldy, dep habarlaıdy infohub.kz saıty.
RIA Novostıdiń Ekinshi Batys okrýgtik áskerı sotynyń zalynan habarlaýynsha, sýdıa sheshimdi jarıalady: «Qylmystardyń jıyntyǵy boıynsha Arestovıch Alekseı Nıkolaevıchke túpkilikti jaza retinde 11 jyl bas bostandyǵynan aıyrý taǵaıyndalsyn». Alǵashqy úsh jyldy túrmede ótkizedi, qalǵan merzimin jalpy rejımdegi kolonıada óteıdi. Sonymen qatar, sot oǵan tórt jyl boıy ınternettegi saıttar men arnalardy basqarýǵa tyıym saldy.
Arestovıch Reseıde izdeý jarıalanǵan. Tergeý anyqtaǵandaı, 2022 jyldyń 17 naýryzynda ol áleýmettik jeliler men beınehostıngterde reseılik áskerlerdi jabdyqtaý júrgiziletin temir joldardy joıýǵa shaqyrǵan beıneúndeý jarıalaǵan. Sol jyldyń 8 sáýirinde ol Kramatorskidegi temirjol vokzalyn Reseı Qarýly Kúshteriniń áskerı qyzmetkerleri atqylaǵany týraly jalǵan málimetterdi jelide jarıalap, keminde 33 adam qaza taýyp, 100-ge jýyq beıbit turǵyn jaralanǵanyn málimdegen.
Arestovıchtiń áreketteri Reseı QK-niń 205.2-babynyń 2-bóligi (ınternetti paıdalana otyryp, terorıstik qyzmetke jarıa shaqyrý) jáne 207.3-babynyń 2-bóliginiń «d» tarmaǵy (ulttyq alaýyzdyq sebepteri boıynsha Reseı Qarýly Kúshteri týraly ádeıi jalǵan aqparat taratý) boıynsha saralanǵan.
Eske salaıyq, Arestovıch Ýkraına prezıdenti keńsesiniń keńesshisi qyzmetin atqarǵan jáne Dneprdegi zymyran oqıǵasyna baılanysty janjaldan keıin 2023 jyldyń basynda ony tastap ketken. Ol áleýmettik jelide ótinish fotosyn jarıalap, jibergen prınsıptik qateligine baılanysty otstavkaǵa ketkenin habarlaǵan. 2023 jyldyń kúzinde Ýkraınada oǵan qatysty qylmystyq is qozǵalǵan, al 2025 jyly prezıdent Vladımır Zelenskı oǵan qarsy sanksıalar engizgen.