Arızona kosmetıkalyq alyp L’Oreal-di tutynýshylardyń quqyǵyn buzdy dep resmı túrde aıyptaǵan AQSH-taǵy alǵashqy shtat boldy. Shtat prokýratýrasy kompanıa shashty túzetetin tanymal quraldarynyń onkologıalyq aýrýlarmen baılanysy týraly derekterdi jasyrdy dep málimdedi, dep habarlaıdy infohub.kz saıty.
Reuters dereginshe, talap aryzda L’Oreal shtattyń tutynýshylar quqyǵyn qorǵaý týraly zańdaryn buzdy dep aıyptalyp otyr — ónim analyq bez jáne jatyr obyry qaýpi týraly eskertýsiz satylǵan.
Shtat bıligi aıyppul salýdy jáne zalaldy óteýdi, sondaı-aq kompanıany ónim satýdy toqtatýǵa mindetteıtin sot sheshimin talap etip otyr.
Aıta keteıik, qazir L’Oreal Chıkagodaǵy federaldyq sotta biriktirilgen 12 myńnan astam osyndaı talap aryzǵa tap bolyp otyr.
Alǵashqy talap aryzdar 2022 jyly Ulttyq densaýlyq saqtaý ınstıtýttarynyń zertteýi jarıalanǵannan keıin túse bastady. Onda Dark and Lovely, Optimum jáne basqa da saýda markalarymen satylatyn (shashty máńgilikke túzetýge ýáde beretin) quraldardy qoldanatyn áıelderde jatyr obyrynyń damý yqtımaldyǵy eki eseden astam joǵary bolǵany aıtylǵan.
Alaıda L’Oreal USA ókili kompanıa óz óniminiń qaýipsizdigine senimdi ekenin jáne bul tujyrymdardyń zańdyq nemese ǵylymı negizi joq dep sanaıtynyn málimdedi.
Buǵan deıin «Kýrsıv» álemdi onkologıa órleýi kútip turǵanyn jazǵan. Dúnıejúzilik densaýlyq saqtaý uıymynyń jahandyq baıandamasyna sáıkes, 2050 jylǵa qaraı planetada obyrmen aýyratyndar sany jylyna 35 mln adamǵa deıin ósedi.