Qazaqstan Prezıdenti Arman Shaqqalıevti saýda jáne ıntegrasıa mınıstri qyzmetine qaıta taǵaıyndaý týraly jarlyqqa qol qoıdy, dep habarlaıdy infohub.kz saıty.
Aqordanyń resmı habarlamasynda aıtylǵandaı, «Memleket basshysynyń Jarlyǵymen Shaqqalıev Arman Abaıuly Qazaqstan Respýblıkasynyń saýda jáne ıntegrasıa mınıstri bolyp taǵaıyndaldy».
Arman Shaqqalıev 1977 jyly Qaraǵandy oblysynyń Balqash qalasynda dúnıege kelgen. Ol L.N. Gýmılev atyndaǵy Eýrazıa ýnıversıtetin, E.A. Bóketov atyndaǵy Qaraǵandy memlekettik ýnıversıtetin, sondaı-aq M. Dýlatov atyndaǵy Qostanaı ınjenerlik-ekonomıkalyq ýnıversıtetin bitirgen.
Eńbek jolyn Astana jáne Aqmola oblysy boıynsha «Kásiporyndardy qaıta uıymdastyrý jáne taratý agenttigi» AAQ-da zań keńesshisi bolyp bastaǵan. 2001-2002 jyldary QR Memlekettik materıaldyq rezervter agenttiginde bas maman jáne bólim bastyǵy qyzmetterin atqarǵan.
2002-2004 jyldary QR Memlekettik kirister mınıstrliginiń Dármensiz boryshkerlermen jumys jónindegi komıtetinde dármensiz kásiporyndardy taldaý jáne monıtorıń basqarmasyn basqarǵan. 2004-2006 jyldary «Qazaqstan metrologıa ınstıtýty» respýblıkalyq memlekettik kásipornynyń dırektory bolǵan.
2006-2007 jyldary Dármensiz boryshkerlermen jumys jónindegi komıtet tóraǵasynyń orynbasary qyzmetin atqarǵan. 2007-2008 jyldary Qarjy mınıstrligi, Ekonomıka jáne búdjettik josparlaý mınıstrligi qurylymdarynda, sondaı-aq «QazAgro» holdıńinde basshylyq qyzmetterde jumys istegen.
2008-2016 jyldary «QazInSt» RMK-ny basqarǵan. Keıin 2016-2018 jyldary Eýrazıalyq ekonomıkalyq komısıanyń tehnıkalyq retteý jáne akredıtteý departamentiniń dırektory bolǵan. 2018-2019 jyldary QR Investısıalar jáne damý mınıstrliginiń Tehnıkalyq retteý jáne metrologıa komıtetiniń tóraǵasy qyzmetin atqarǵan.
2019-2020 jyldary QR Saýda jáne ıntegrasıa mınıstrliginiń Tehnıkalyq retteý jáne metrologıa komıtetiniń tóraǵasy bolǵan. 2020-2022 jyldary Máskeýdegi Eýrazıalyq ekonomıkalyq komısıanyń básekelestik jáne monopolıaǵa qarsy retteý jónindegi Alqasynyń múshesi (mınıstri) bolǵan.
2022-2023 jyldary QR saýda jáne ıntegrasıa vıse-mınıstriniń birinshi orynbasary bolǵan. QR saýda jáne ıntegrasıa mınıstri qyzmetine alǵash ret 2023 jylǵy 2 qyrkúıekte taǵaıyndalǵan.