inDrive servısiniń negizin qalaýshy jáne bas atqarýshy dırektory Arsen Tomskı Almatyǵa kelip, kıimin jańartýdy uıǵardy. Oǵan eń jaqyn ornalasqan Esentai Mall saýda ortalyǵyndaǵy kıim baǵalary baılyǵy 865 mıllıon dollarǵa baǵalanǵan kásipkerdi tań qaldyrdy, dep habarlaıdy infohub.kz saıty.
Áserleri týraly bıznesmen Threads áleýmettik jelisinde jazdy. Onyń aıtýynsha, ol Almatyda maýsym aıynyń basynan beri bolmaǵan. Qalaǵa oralǵan soń kásipker kıiminiń az ekenin baıqap, eń jaqyn saýda ortalyǵyna barǵan.
«Men, jumsaq tilmen aıtqanda, eń kedeı adam emespin, biraq myna fýtbolkalardy 1 000 dollarǵa kim satyp alady? Eń bastysy, ne úshin?» — dep jazdy Tomskı.
Jazba shamamen 103 myń qaralym jınap, qyzý talqylaý týdyrdy. Paıdalanýshylar Qazaqstandaǵy kıim baǵalaryn talqylap, óz tájirıbelerimen bólise bastady.
Pikir qaldyrýshylardyń biri kóktemde Astanada New Balance krosovkasy 129 myń teńge turǵanyn, al Qytaıda dál sondaı jupty 36 myń teńgege satyp alǵanyn aıtty. Onyń sózinshe, Qazaqstanda 96 myń teńge turǵan Nike djınsysyn Nike Factory Store dúkeninen 19 myń teńgege alýǵa bolady.
«Jalpy Qazaqstanda zat satyp alýǵa qulqyń bolmaıdy», «Er jetkende Arsen sıaqty bolamyn — baı, biraq aqshanyń qadirin biletin», «Shetelde brendter «Esentaıǵa» qaraǵanda áldeqaıda arzan. Sonda satyp alǵan durys. Qorshaǵan ortaǵa kózge túsý úshin bolsa, osynda durys. Tek pafos úshin», — dep jazady paıdalanýshylar.
Aıta keteıik, Forbes Kazakhstan reıtıńine sáıkes, 2026 jyly Tomskı Qazaqstannyń 75 eń baı bıznesmeniniń arasynda 12-orynda tur. Basylym onyń baılyǵyn 865 mıllıon dollarǵa baǵalaıdy. Kásipker baılyǵynyń negizgi kózi — IT-bıznes.
Buǵan deıin Kursiv LifeStyle inDrive negizin qalaýshy Arsen Tomskı men Kamıla Lýkpanovanyń Stambýldaǵy úılený toıyn uıymdastyrýǵa shamamen 470 mıllıon teńge jumsalǵanyn jazǵan. Bosfor jaǵasyndaǵy eki kúndik saltanatqa shamamen 250 qonaq jınalǵan.