Almatyda mıllıoner jáne inDrive negizin qalaýshy Arsen Tomskıdiń jobasy — inVision U ýnıversıteti resmı túrde ashyldy. Jańa oqý ornynyń baǵdarlamasy klasıkalyq ýnıversıtetterden nesimen erekshelenetinin Kursiv Lifestyle bildi, dep habarlaıdy infohub.kz saıty.

Oqý negizinen aǵylshyn tilinde júrgiziledi. Birinshi kýrs stýdentteri «oqý, oqý jáne taǵy da oqý» degen antyn dál aǵylshyn tilinde aıtty.

Ýnıversıtet rektory Endrú Vahteldiń aıtýynsha, negizgi bakalavrıat baǵdarlamasy ekinshi kýrstan bastalady. Birinshi kýrsta stýdentterge standartty emes oılaýǵa úıretedi. Vahteldiń ózi, mysaly, Emınem men Vladımır Vysoskıdiń óleńderin taldaıdy. Onyń kýrsy thinking artistically — aqynsha oılaý dep atalady. Stýdentter qazaq nemese orys tilinde óleń jazyp kóredi, sodan keıin ózderiniń jáne neırojeliniń jazǵan óleńderin salystyrady.

«Eń bastysy — aqyndardy tárbıeleý emes, stýdentterdiń sýretkerdiń álemge qalaı qaraıtynyn sezinýi, mundaı oılaýdyń ne beretinin túsinýi. Olarda scientific thinking, design thinking, thinking in time bar. Iaǵnı, olarǵa osy álemdi qaıta paıymdaýǵa múmkindik beretin birqatar kýrstar. Sodan keıin shamamen eki jylǵa sozylatyn qalypty akademıalyq baǵdarlamalary bar», — dedi ýnıversıtet rektory.

Sońǵy, tórtinshi oqý jylyn stýdentter óz startapyna nemese qaıyrymdylyq jobasyna arnaıdy. 4–5 adamnan turatyn toptarda olar sheshýge tyrysatyn jergilikti máseleni tańdaıdy. Arsen Tomskı bastaǵan qazylar alqasy úzdik birneshe jobany iriktep, olarǵa ınvestısıa salady. Bul túlekterdiń ýnıversıtetti bitirgen soń elde qalýyn yntalandyrý úshin jasalady.

«Biz túsinemiz: qyzyqty máseleler mýltıdısıplınarly, biraq mýltıdısıplınarly adamdy jaratý múmkin emes. Iaǵnı, Leonardo da Vınchıdi jasaý paıdasyz, ol — biregeı tulǵa. Sen basqa adamdarmen jumys isteı alatyn, ózgeshe oılaıtyn jáne birge ónimdi jumys isteı alatyn adamdy qalyptastyra alasyń. Mine, bul — osyndaǵy bilimniń máni», — dep túsindirdi Vahtel.

Arsen Tomskıdiń aıtýynsha, alǵashqy jyldary oqý Satpaev ýnıversıtetiniń bazasynda júrgiziledi. Shamamen eki-úsh jyldan keıin onyń komandasy jeke kampýs salý úshin jer telimin tabady.

Buǵan deıin Kursiv Lifestyle Arsen Tomskıdiń Astanada kıbersportshylar da oqıtyn sport ýnıversıtetin ashqanyn jazǵan bolatyn.