Japonıada ótip jatqan XX Jazǵy Azıa oıyndarynda 27 jastaǵy sablıst Artem Sarkısán Qazaqstanǵa semserlesýden alǵashqy medalin syılady. Ol qola júldeger atandy, dep habarlaıdy infohub.kz saıty.
Qaraǵandylyq sportshy júldege barar jolda aldyn ala kezeńde bes saıystyń tórteýinde jeńiske jetti. 1/8 fınalda qazaqstandyq úndistandyq Gısho Nıdhı Kýmaresan Padmany 15:11 esebimen utty.
Shırek fınalda Sarkısánnyń qarsylasy Parıj-2024 Olımpıadasynyń chempıony ońtústikkoreıalyq Gendong Do boldy. Tartysty ári teń dodada qazaqstandyq sablıst 15:14 esebimen basym túsip, keminde qola medalǵa kepildik aldy.
Jartylaı fınalda Sarkısánǵa Ońtústik Koreıanyń odan da qaýipti ókili – úsh dúrkin Olımpıada chempıony ári bes dúrkin álem chempıony Sangýk O qarsy turdy. 4:8 esebimen artta qalǵan qaraǵandylyq qarsylasyn qýyp jetýge shaq qaldy – 7:8, alaıda qatarynan ekinshi sensasıa bolmady: saıys qorytyndysy – 9:15.
Jartylaı fınalda jeńilgenine qaramastan, Sarkısán tarıhta sablısterdiń jeke saıysynda Azıa oıyndarynyń medalin jeńip alǵan Qazaqstannyń tuńǵysh ókili retinde qaldy.
Sol kúni qazaqstandyq rapırashylar Sofıa Aktaeva men Alına Gnoeva 1/8 fınal kezeńinde ónerlerin aıaqtady, al sablıst Nurmuhamed Jaılybaı irikteý saıystarynan óte almady.
Aldyńǵy kúni shpagashylar Irına Bakaldına men Vladıslava Andreeva shırek fınalda qarsylastaryna jol berip, medaldan bir qadam qalǵanda toqtady.
Jalpy, Azıadalardyń semserlesý týrnırlerinde Qazaqstan úsh altyn, tórt kúmis jáne 13 qola medal jeńip aldy. Shpagashylar quramasy eki ret (1994, 2002) chempıon atandy, sondaı-aq Dmıtrı Aleksanın osy qarý túrinen Azıada-2018-de jeńimpaz boldy.
XX Jazǵy Azıa oıyndarynyń saltanatty ashylýy 19 qyrkúıekte ótti. 45 eldiń sportshylary qatysatyn jarystarda 460 komplekt júlde sarapqa salynýda. Azıada-2026-da Qazaqstan quramasynyń quramynda 35 sport túrinen 558 sportshy óner kórsetýde.
Oıyndardyń birinshi kúni qazaqstandyqtar tórt altyn medal jeńip aldy. Chempıondar: veloshabandozdar Rınata Sýltanova men Alekseı Lýsenko, sondaı-aq karatıster Jolaman Bıgabyl men Sofá Berýlseva. Keshe qurama qorjynyna besinshi altyndy MMA faıteri Erkinǵalı Búrkitalın, altynshysyn – onyń aralas jekpe-jektegi komandalasy Qadyrbek Shynbaev saldy. Búgin Lýsenko Azıa oıyndary-2026-nyń eki dúrkin chempıony atandy.
Oıyndardyń úshinshi kúninen keıin Qazaqstan beıresmı medal esebinde tórtinshi orynda tur.