Qazaqstannyń rapıramen semserlesý quramasy Gonkongta ótken álem chempıonatyndaǵy ónerin aıaqtady. Sońǵy kúni komanda áıelder arasyndaǵy týrnırde óner kórsetti. Rapırashylardyń nátıjelerin shaqyrylǵan bapker-keńesshi Artýr Ahmatkýzın qorytyndylady, dep infohub.kz saıty habarlaıdy.
Reseılik maman osy jyldyń naýryz aıynan bastap Qazaqstan ulttyq quramasynda shaqyrylǵan bapker-keńesshi retinde jumys isteıdi. Otandyq rapırashylar sonymen qatar semserlesý deńgeıi óte joǵary reseılik komandamen birge jattyǵady. Ahmatkýzın qazaqstandyq sportshylardyń álem chempıonatyndaǵy óneri aıaqtalǵan soń, jattyqtyrý qajet negizgi sátter jáne birlesken jattyǵý prosesi týraly aıtyp berdi.
«Qazaqstannyń rapıramen semserlesý quramasy óte qyzyqty. Jigitter sheber, biraq qazir ózderine jáne óz kúshterine degen senim jetispeıdi. Olar óz qabiletterin túsinbeıtin sıaqty. Senim nátıje bolǵanda ǵana keledi. Men olardyń eńbegi, berilgendigi men ózin qurban etýi arqyly nátıje bolady dep úmittenemin. Jigitterdiń sheberligi kórinip tur, sebebi keńestik mekteptiń negizi bar. Tehnıkasy jáne aıaq qımyly jaqsy qoıylǵan. Osyndaı bazalyq nárseler meńgerilgen, endi tek senim qajet, al ol turaqty shyǵýlar men halyqaralyq týrnırlerden keıin keledi, óıtkeni básekelestik prosesinde jarysý mańyzdy. Dál osy jerde, álem chempıonatyndaǵy óner týraly aıtsam, jumysty baǵalaý áli qıyn. Men komandamen eki aı buryn jumys isteı bastadym. Naqty unaǵany – jigitter birinshi toptyq týrdy senimdi ótti. Men úshin ekinshi kúnge shyǵý – kórgim keletin mınımým. Shyǵarylý kezeńindegi jeńister kútilgen. Bul tusta azdap jetkiliksiz boldy. Qazaqstan quramasy úshin jaqsy jaǵy – qazir Reseı quramasymen birlesken jıyndar ótkizip jatyrmyz. Reseıdiń rapıramen semserlesý quramasy álemde óte kúshti. Jattyǵý prosesinde úlken sparrıng alamyz, osynyń arqasynda sheberlik ósedi. Kúshtilermen básekelesý – olardyń artynan erý degen sóz. Men úshin bul progres aıqyn, sebebi birinshi jıynnan aıyrmashylyǵyn kórip otyrmyn. Jıyndarda únemi synaqtar, jaýyngerlik tájirıbeler ótkizemiz, sportshylar ózderin kórsetedi. Bul eńbek izsiz ketpeıdi dep úmittenemin. Bul uzaq proses, olar talaptardy túsinip, qajetti daǵdylar paıda bolǵannan keıin, jaqyn arada nátıjelerde kórinis tabady», — dedi Ahmatkýzın.
Aıta keteıik, 38 jastaǵy Ahmatkýzın 2016 jyly rapıramen semserlesýden Olımpıada chempıony, sondaı-aq Reseı quramasy sapynda 2013 jylǵy álem chempıonatynyń kúmis júldegeri.