Túrkistan oblysy Arys qalasy ákiminiń 22 jastaǵy ulyna qatysty qylmystyq is toqtatyldy. Ol 20 jastaǵy jigittiń eki aıaǵynan aıyrylýyna ákep soqqan jol apatyna qatysy bar edi, dep habarlaıdy infohub.kz saıty.
Bul týraly NUR.KZ oblystyq polısıa departamentine silteme jasap málimdedi. Sóz mamyr aıynyń sońynda Astana — Pavlodar tasjolynda bolǵan jol-kólik oqıǵasy jaıynda bolyp otyr.
Sol kezde kólik jol bógetine soǵylǵan. Taksıdiń jolaýshy oryndyǵynda otyrǵan 20 jastaǵy jigit aýyr jaraqat aldy. Jas jigit klınıkalyq ólimdi bastan ótkerip, eki aıaǵynan aıyryldy.
Keıin rólde Túrkistan oblysy Arys qalasy ákiminiń 22 jastaǵy uly bolǵany anyqtaldy. Ol qylmystyq is boıynsha kúdikti retinde tanyldy. Ákimniń ózi Qaısar Manqaraev kez kelgen aralasýdy joqqa shyǵaryp, laýazymy tergeý barysyna áser etpeıtinin atap ótken bolatyn.
Búgin, 22 qyrkúıekte, qylmystyq istiń amnıstıamen toqtatylǵany belgili boldy.
«Aǵymdaǵy jylǵy 16 qyrkúıekte jol-kólik oqıǵasy faktisi boıynsha qylmystyq is Qazaqstan Respýblıkasynyń 2026 jylǵy 1 shildedegi zańynyń amnıstıa aktisiniń negizinde toqtatylyp, bekitý úshin Ekibastuz qalasynyń prokýratýrasyna jiberildi. Sonymen qatar, zardap shekken adamǵa azamattyq tártippen sotqa júginý usynyldy», — dedi Pavlodar oblysy polısıa departamentiniń baspasóz qyzmeti.