Qyrǵyzstanda Ulttyq qaýipsizdik memlekettik komıtetiniń jańa tóraǵasy resmı túrde taǵaıyndaldy. Jogorký Keńesh depýtattary bul laýazymǵa Maksat Asanalıevtiń kandıdatýrasyn biraýyzdan qoldady, dep habarlaıdy infohub.kz saıty.
24.kg basylymynyń habarlaýynsha, sheshim 2 qyrkúıekte parlament otyrysynda qabyldanǵan. Buǵan deıin sot-quqyqtyq máseleler, quqyq tártibi, qylmysqa qarsy kúres jáne sybaılas jemqorlyqqa qarsy is-qımyl jónindegi profıldi komıtet Asanalıevti bas prokýror qyzmetinen bosatýǵa kelisim bergen edi, depýtattar da bul sheshimdi biraýyzdan maquldady.
Maksat Asanalıev 1978 jyly 24 naýryzda Ystyqkól oblysynyń Qara-Koo aýylynda dúnıege kelgen. Ol Qyrǵyz ulttyq ýnıversıtetiniń zań fakúltetin bitirgen. Eńbek jolyn memlekettik qaýipsizdik organdarynda bastap, UQMK-da tergeýshi jáne erekshe mańyzdy ister boıynsha aǵa tergeýshi bolyp jumys istegen. Keıin prokýratýra jáne quqyq qorǵaý organdary júıesinde basshylyq qyzmetterdi atqarǵan. 2024 jyly Qyrǵyzstannyń bas prokýrory bolyp taǵaıyndalsa, bıylǵy jyldyń maýsymynda UQMK tóraǵasynyń mindetin atqarýshy boldy.
Kásibı ortada Asanalıev qatal jumys stılimen jáne rezonanstyq qylmystyq isterdi tergeý kezindegi ustanymdylyǵymen tanymal.
Eske salaıyq, bıylǵy jyldyń aqpan aıynda Kamchybek Tashıev mınıstrler kabıneti tóraǵasynyń orynbasary jáne UQMK tóraǵasy qyzmetinen bosatylǵan bolatyn. Tashıevtiń ózi keıin jumystan shyǵarylýyn kútpegenin moıyndady. Prezıdent Sadyr Japarov otstavkanyń sebepterin túsindirip, prezıdent janynan Memlekettik kúzet qyzmetin qurýdy bastamashy etti. Sonymen qatar, Japarov memleket basshysyn merziminen buryn saılaý normalaryn túsindirý úshin Konstıtýsıalyq sotqa júgindi, sodan keıin parlament spıkeri Nýrlanbek Týrgýnbek ýýlý óz erkimen ókilettigin tapsyrdy.
Kóp uzamaı Tashıevtiń Qyrǵyzstanǵa oralǵany týraly habarlar paıda boldy, al Japarov burynǵy UQMK basshysynyń memlekettik qyzmetke eshqashan oralmaıtynyn málimdedi. Sondaı-aq prezıdent memlekettik tóńkeris múmkindigin joqqa shyǵaryp, eldiń soltústik pen ońtústikke bólinýine jol berilmeıtinin atap ótti. Tashıevten keıin UQMK tóraǵasy qyzmetin ýaqytsha Jýmgalbek Shabdanbekov atqarǵan.