AQSh Jaǵalaý kúzeti Bermýd araldarynan Bostonǵa ushyp bara jatqan, bortynda alty adam bolǵan medısınalyq jedel járdem ushaǵyn izdestirip jatyr. Ushaq senbi kúni tańerteń AQSh Federaldyq avıasıa ákimshiligimen (FAA) baılanysyn úzgen, dep habarlaıdy infohub.kz saıty.
Osy ákimshilik ókili Guardian basylymyna bergen málimdemesinde Gulfstream G-100 ushaǵyna qatysty izdeý-qutqarý dabyly jergilikti ýaqytpen senbi kúni tańǵy 1.20-da jarıalanǵanyn aıtqan.
Associated Press agenttigi Bermýd áýejaıynyń operatory Skyport kompanıasynyń málimdemesine silteme jasap habarlaǵandaı, Kanadada tirkelgen medısınalyq jedel járdem ushaǵy túnde Bermýdtaǵy LF Wade halyqaralyq áýejaıynan Massachýsetske qaraı ushqan kezde bortynda tórt ekıpaj múshesi men eki jolaýshy bolǵan.
NBC News telearnasy ushaq operatory — Latitude Air Ambulance kompanıasynyń ushý operasıalary jónindegi dırektory Klarens Togeretstiń málimdemesine silteme jasap, ushaq Bermýdta medısınalyq evakýasıa júrgizip jatqanyn habarlady.
«Ekıpajymyz ýaqytyly habarlaspaǵan kezde biz árdaıym qatty alańdaımyz. Biraq taǵy da aıtamyn: optımısik jáne oń kózqaraspen qarasaq, bul eń nashar jaǵdaı boldy degendi bildirmeıdi», — dedi ol NBC News-ke.
Sondaı-aq NBC Bostondaǵy Logan halyqaralyq áýejaıyn basqaratyn Massachýsets port bıliginiń ushaq kestedegi ýaqytynda kelmegenin málimdegenin jazdy. Port bıliginiń ókili: «İzdeý jalǵasyp jatqanda, oıymyz borttaǵylarmen jáne olardyń jaqyndarymen birge», — degen.
FAA ushaqty tabý úshin Qutqarý úılestirý ortalyǵymen jáne AQSh Jaǵalaý kúzetimen birlesip jumys istep jatyr.
Jaǵalaý kúzeti X áleýmettik jelisindegi paraqshasynda jarıalaǵan málimdemesinde senbi kúni tańerteńgi jaǵdaı boıynsha izdeý aımaǵy Massachýsets shtatyndaǵy Nantaket aralynyń jaǵalaýynda ekenin habarlady.
Málimdemede áýe jáne sý ústi toptary ushaqty izdeýge kiriskeni qosylǵan.
ABC News tergeýge qatysy bar derekkózge silteme jasap, ushaq bortynda amerıkalyqtar bolmaǵanyn habarlady, alaıda borttaǵylardyń kim ekeni dereý jarıalanbaǵan.
Basylymnyń derekkózine qaraǵanda, sheneýnikter ushaq sýǵa qulamas buryn 7 500 fýt bıiktikke deıin jyldam tómendegen dep esepteıdi.