Aqmola oblysynda kadrlyq ózgeris boldy: oblys ákiminiń ókimimen Asqat Ahmedánov Arshaly aýdanynyń ákimi bolyp taǵaıyndaldy, dep habarlaıdy infohub.kz saıty.
Taǵaıyndaý týraly Aqmola oblysy ákimdiginiń resmı Telegram-arnasy habarlady. Buǵan deıin Asqat Ahmedánov 2026 jyldyń aqpanynan bastap jańa taǵaıyndaýǵa deıin Aqmola oblysy Kásipkerlik jáne ónerkásip basqarmasynyń basshysy qyzmetin atqarǵan.
Asqat Ahmedánov 1992 jyly 29 mamyrda Soltústik Qazaqstan oblysy Ýálıhanov aýdanynyń Komsomolskoe aýylynda dúnıege kelgen. 2013 jyly «Turan-Astana» ýnıversıtetin «memlekettik jáne jergilikti basqarý» mamandyǵy boıynsha bitirgen.
Aýdannyń jańa ákiminiń eńbek joly negizinen Atbasar aýdanymen baılanysty. 2014–2017 jyldary Atbasar aýdany Novoaleksandrov aýyldyq okrýgi ákimi apparatynyń bas mamany bolyp jumys istegen. 2017 jyly Atbasar aýdany Bastaý aýyldyq okrýgi ákimi apparatynyń bas mamany qyzmetin atqarǵan.
2017–2019 jyldary Ahmedánov Atbasar aýdany Pokrov aýyldyq okrýginiń ákimi boldy, 2019–2021 jyldary Atbasar aýdany kásipkerlik bólimin basqardy. Keıin, 2021–2023 jyldary Atbasar aýdany Makeev aýyldyq okrýginiń ákimi qyzmetin atqarsa, 2023–2026 jyldary Zerendi aýdany ákiminiń orynbasary boldy.
Eske salaıyq, 21 qyrkúıekte Aqmola oblysynda Stepnogorsk ákimi Ǵaıdar Kásenov pen Arshaly aýdanynyń ákimi Dostanbek Esjanov qyzmetterinen bosatylǵan bolatyn. Sol kúni Stepnogorsk ákimi qyzmetine Talǵat Erseıtov taǵaıyndaldy.