Qazaqstan astanasynyń halyqaralyq áýejaıynda asa qaýipti ınfeksıalardy anyqtaý kezindegi is-qımyldarǵa arnalǵan praktıkalyq oqý-jattyǵý ótti. Qoǵamdyq densaýlyq saqtaý ulttyq ortalyǵy (QDSUO) elge qaýipti vırýstardyń ákeliný qaýpine jedel qyzmetterdiń daıyndyǵyn tekserdi, dep habarlaıdy infohub.kz saıty.
Oqý-jattyǵý legendasy boıynsha, ushaq bortynda juqpaly dertke shaldyqqan jolaýshy bolǵan. Dárigerler naýqasty jedel oqshaýlap, baılanysta bolǵan adamdardy anyqtap, áýe kemesin zararsyzdandyrýǵa májbúr boldy.
«Naýqasty oqshaýlaý, ushaqty sanıtarlyq turaqqa jiberý, baılanysta bolǵan adamdardy anyqtap, olardy medısınalyq baqylaýǵa alý, zararsyzdandyrý, jedel habarlaý jáne qatysqan qyzmetterdiń ózara is-qımyly pysyqtaldy», — delingen habarlamada.
Sonymen qatar QDSUO jedel ortalyǵynyń mamandary Kongo Demokratıalyq Respýblıkasyndaǵy Ebola qyzbasy boıynsha aǵymdaǵy epıdemıologıalyq ahýaldy jáne Býndıbýgıo vırýsynyń erekshelikteri týraly málimetterdi usyndy.
Oqý-jattyǵý úılesimdi ótip, barlyq qyzmetterdiń asa qaýipti ınfeksıalardyń ákeliný qaýpine daıyndyǵyn tekserýge múmkindik bergeni atap ótildi.
QDR úkimetiniń 12 qyrkúıektegi derekterine sáıkes, respýblıkada juqtyrǵandar sany 7022 adamǵa jetti. 3398 naýqas qaza tapty, 1671 adam saýyǵyp shyqty.
Eske salaıyq, Dúnıejúzilik densaýlyq saqtaý uıymy buǵan deıin Ebolanyń jańa shtammynyń taralýyn toqtatýǵa bilikti medıkterdiń, jedel seriktesterdiń jáne qarjylandyrýdyń jetispeýshiligi kedergi keltiretinin eskertken. İndet oshaǵynyń geografıasy keńeıgen saıyn máseleler ýshyǵa túsýde.
Buǵan deıin «Kýrsıv» Ebola epıdemıasymen kúresý úshin 5 myń medısına qyzmetkeri jetispeıtinin jazǵan.
Sondaı-aq aǵymdaǵy indet oshaǵy Ebola vırýsynyń Býndıbýgıo túrinen týyndap, Kongo tarıhyndaǵy eń iri ári eń ólimge ákeletin oshaqqa aınalǵany habarlanǵan.